Na Corsou Eduard Braam (MFK) ta retira candidatura pa minister

WILLEMSTAD - Dr Eduard Braam a notifiká ayera entre otro na su partido ku e ta retirá su kandidatura pa minister, den e kaso aki pa hustisia pa partido MFK. E desishon manera dòkter Braam a bisa ta unu di hopi kurashi pero ta pa trese trankilidat den komunidat i pa su partido tambe.

For di momentu ku sr. Braam a keda postulá pa e puesto di minister den e kaso aki di hustisia, a kuminsá basta krítika kontra di dje. A bin dilanti un kaso ku ta akus’é di dje mas di 20 aña pasá. Ta trata di un kaso manera dòkter Braam mes a bisa ku e no tin karchi kastigu pe.

Sinembargo e echo ku dòkter Braam djárason a subi trapi bai serka gobernadó a lanta aun mas spekulashon den direkshon ku lo a informe ku e no a òf lo no pasa screening. Na momentu ku el a baha trapi for di gobernadó el a informá prensa ku ta un kombersashon ameno e tabatin ku gobernadó.

Ayera sinembargo e ta sali i bisa ku e ta retirá su kandidatura komo minister pa partido MFK. Sr. Braam ta akusá e kontrinkantenan polítiko a saka e informashonnan di dje di for di 20 aña pasá. Esaki sinembargo a krea un diskushon ku a kousa intrankilidat. Ta sigui tene e kaso aki na bida i asta eksaherá pa sierto figura den komunidat.  E ta hasi daño na su mama defuntu, su kasá, yunan i simpatisadónan i  awor tambe na e partido ku a dun’é honor pa bira minister.

Dòkter Braam ta haña ku si e aseptá e kandidato pa minister, loke a pasa òf keda sin pasa mas di 20 aña pasá lo bolbe lanta kabes i esei no ta sirbi e meta ku MFK a primintí pueblo esta un komienso nobo i limpi. I p’esei e mester a hasi eskoho i e eskoho ta ku e ta retirá su kandidatura pa minister di MFK. Texto ta skirbi den papiamento fonetico di Corsou.