Blokhuis: Pa 21 di juni e certificado Europeo di Vacunacion mester ta disponible tambe pa Caribe Hulandes

DEN HAAG – Pa dia 21 di juni proximo e certificado Europeo di Vacunacion mester ta disponible tambe pa e partinan Caribense di Reino Hulandes. Asina sub secretario Hulandes di salud Blokhuis a contesta miembronan di Parlamento Jorien Wuitte y Jan Paternotte di partido D66. Si ta logra alcansa e meta pa e fecha ey, ta depende di si logra haya un solucion pa algun asunto practico. “Pasobra e residentenan den e islanan no tin un asina yama BSN, -y consecuentemente no tin un DigiD-, ta pone cu e residentenan di e islanan cu kier un certificacion di vacunacion, ta cay bou di e ruta di excepcioon pa pidi un certificado di vacuna. Mi ta papiando riba esaki cu e islanan BES (Bonaire, Saba, Sint Eustatius),” Blokhuis a bisa.

COMISIONAN

Comisionan a wordo forma pa discuti e preparacion pa certificado di vacuna y e introducion di e asina yama certificado ‘berde’ den e paisnan CAS (Curaçao, Aruba, St. Maarten) y islanan BES. E desaroyo rondo di e certificado digital berde riba nivel nacional y Europeo ta indica riba e certificado y si e uso di e certificado digital berde por wordo considera como expediente pa e parti Caribense di Reino Hulandes.  “E afirmacion di Union Europeo tambe atende e certificadonan otorga den teritorio ultramar Europeo. Esey kier men cu e fecha limite di juni 21 tambe ta aplica pa e paisnan CAS y islanan BES” Blokhuis a sigui bisa. Esey ta confirma, cu por biaha tambe entre paisnan ultramar Europeo y otro paisnan cu e certificado digital berde.