Na Corsou 3 miembro gerensiadi PSB Bank a keda suspendi relaciona cu iregularidad

WILLEMSTAD - Un informashon ku a bira konosí ayera ta ku ta PSB Bank a skors 3 miembro di gerensia. Esaki relashoná ku iregularidatnan na e banko konserní. Nos no tin muchu detaye konfirmá di gerensia/direktiva di e banko mes relashoná ku e kaso aki, pero si investigashonnan ku a hasi ta mustra ku e lo tin di haber ku e kompania ku ta brinda servisio di Pagafasil.

Segun nos fuentenan,  promé ku APC a kumpra PSB Bank over, nan lo a mustra ku e sistema di Pagafasil no ta parti di nan negoshi prinsipal komo banko i a kuminsá hasi trámitenan pa por a bende e aktividat aki.

A kana un kaminda di basta análisis hasiendo uso di profeshonalnan ku ta dominá e materia i a sali na kla ku esun mas yama pa por tum’e over ta Aqualectra,. Esaki teniendo na kuenta ku mayoria transakshon via di Pagafasil ta relashoná ku resibunan ku ta paga Aqualectra.

Informashon ku nos ta dispone di dje ta indiká ku Aqualectra na su turno tambe a mustra interes pa kumpra e sistema di Pagafasil over. A kana un trayekto basta largu i Aqualectra  a invertí bastante sèn pa por a hasi e investigashonnan nesesario pa nan por tin konfirmashon ku realmente Pagafasil lo kumbiní nan.

Pero kos a dòl dado momentu. E no a dòl na banda di Aqualectra pero si na banda di APC/PSB.

A komprondé ku Aqualectra no tabata muchu kontentu i asta a bin riba mesa pa hiba PSB korte.

Awor direpente ta sali ku tin un ke otro iregularidat ku a sosodé ku e sistema di Pagafasil. Parse ku sènnan di Pagafasil lo no tabata yega nan destino manera mester ta.