Na Corsou duo policial condena na castigol di prison pa maltrato severo riba caminda publico

WILLEMSTAD - E agentenan policial C. Solano (45) i R. Balijn (46) a keda condenana castigo di prison ayera. Tantu Solano komo Balijn ta keda akusá pa maltrato severo, intento di maltrato i maltrato ku violensia riba kaminda públiko dia 18 di yanüari 2020. Durante tratamentu di e kaso anteriormente, riba petishon di abogado Olga Kostrzewski a skucha un agente i un pareha ku a presensiá loke a pasa durante e suseso. Aparte di e kaso aki, Balijn ta keda akusá riba otro kaso ku e tin pendiente. Segun e akusashon riba e dia en kuestion nan lo a maltratá e víktima R. Green malamente, na altura di kaya Libertadora. Nan lo a skòp e, sera su garganta, dal e ku man habrí den su kara, batié ku skòp na banda di su barika, pone ku el a kibra 5 repchi. Segun e prosèsverbal, e dia ei e agentenan tabata patruyando ora nan a mira outo di e víktima tabata aserkando.

Nan a bisa di a mira un hende straño den e vehíkulo sintá patras. Esei tabata e motibu ku nan a duna òrdu pa e shofùr para e outo. Segun e agentenan, e shofùr no a duna oido i a sigui kore. Aparentemente a surgi un persekushon ku na final e shofùr a para e vehíkulo. E agentenan a bisa, direpente nan a mira e porta patras di e outo bula habri i un hòmber kabei rasta a baha kore limpi bai. Segun deklarashon di e víktima tantu na polis komo durante tratamentu di e kaso, e hòmber ku a baha kore bai no tabatin papel. Ora ku el a mira polis el a para, pero despues a sigui kore pasó e no tabata sa ku e agentenan a duna òrdu pa stòp.

Despues ku el a lora e di 3 hanchi el a disidí di para su vehíkulo ora ku polis a bin su tras. El a sigui konta ku Balijn ta esun ku a kana bin riba dje promé i puntr’é dikon e no a para. Segun e víktima el a hisa su man na laira i Balijn a kuminsá batié ku wanta. Despues Solano a kana bin, tene na su garganta ku kasi e no por a hala rosea. Ora el a grita Solano ku e konosé e agente di fam Ruiter, Solano a hala tras lag’é. Balijn a keda puntr’é si ta “homo” e ta , yam’é ladron i a keda batié ku skòp ora el a kai abou.

Nan a batié den su barika ku e konsekuensia ku el a kibra 5 repchi. Segun e akusado, te awe e tin problema ku salú

Segun e víktima, e agentenan despues di nan akto a bui e i a hib’é warda di polis en bes di poliklínika pa su frakturanan. El a bisa nan ku e tin hopi doló, pero nan no a hasi kaso. Balijn na su turno a splika ku tur loke e víktima ta papia no ta kuadra ku bèrdat. El a bisa ku niun momento so el a agredié, manera e ta bisa. Segun Balijn e shofùr a kuminsá resistí i forsageá kuné. Esei a pone ku e mester a dal e un wanta pa e por domin’é. Despues el a bira e hòmber su man tras di su lomba pa purba bui e pero el a kuminsá tira skòp riba dje, dal e na su rudia, man i su dede.

Dor ku e tin problema ku su rudia, el a disidí di hala tras, pasó e tabatin basta doló. Riba e pregunta di fiskal kon bini e víktima/ shofùr tabatin 5 repchi kibrá, Balijn a splika ku esei e no por bisa nada di dje. Solano tambe e bisa ku e no sa nada di kibramentu di repchi.

Segun Solano el a baha último for di e pikòp di polis. Ora el a mira kon e shofùr tabata tira skòp riba su kolega Balijn, el a kue tene na su garganta i bis’é “stòp”. El a bisa ku niun momento so nan no a batié manera e ta bisa. Hues ayera a haña e akusashon di maltrato riba kaminda públiko probá i a kondená Solano na 3 luna kondishonal mas 2 luna ku tabata kologá riba su kabes i pa Balijn 8 luna di kual 5 kondishonal mas 3 aña di prueba. Ambos a keda prohibí pa ehersé nan trabou di polis pa 2 aña i 3 luna. Hues a honra e daño perhuisio di 21 mil florin entre e dos akusadonan.