Na Corsou, Lon Mutueel condena na 6 siman condishonal pa violencia publico

WILLEMSTAD - E conocido hoben S. “Lon” Mutueel (24) ayera a keda condena na un castigo di 6 siman kondishonal den e kaso ku a keda yamá “Sakeo”. Ministerio Públiko a hasi demanda di 6 siman kondishonal mas 180 dia di trabou pa komunidat

Mutueel ta keda akusá pa violensia públiko, instigashon i destrukshon durante e manifestashon i sakeo ku a tuma lugá dia 24 di yüni 2020.

Hues Snitker a bisa ayera den su veredikto, ku su abogado mr Sulvaran a pidi den su defensa pa apsolvé Mutueel for di e akusashon di violensia públiko.

Pero hues ta di opinion ku Mutueel e dia ei a agrupá un kantidat di hende na Post 5 pa bai serka Minister Presidènt na Fort Amsterdam pa skucha nan i demostrá nan malkontentu.

Segun hues riba kámara por a mira ku Mutueel tabata na kabes di e grupo i a yuda sakudí e porta di heru na Fòrti ku na e momento ei tabata será i ku a basha abou. Hues a bisa komo lider e akusado mester tabatin otro aktitut i distansiá su mes for di e violensia ku a sali fo’i man.

Mirando esaki hues ta konsiderá ku e akusado a hasi su mes kulpabel na violensia públiko den union, dor di yuda kibra porta di e entrada prinsipal di Fòrti.

Pa loke ta trata instigashon korte ta apsolvé Mutueel di e akto aki. Mirando tur esakinan hues ta yega na un kastigu di 6 siman kondishonal pa Mutueel. Korte no a haña kastigu di trabou pa komunidat nesesario.