Parti di seleccion di futbol di Corsou ya ta na Guatemala

MANAGUA - Parti di e selekshon nashonal ta na Guatemala pa kuminsá ku e trainingnan pa nos kompromiso di dia 5 di yüni binidero 4 or di atardi kontra British Virgin Islands den stadion Manuel Felipe Carrera, mihó konosí komo stadion El Trébol aya na Guatemala. Awe mardugá 30 di mei e promé grupo di nos hungadónan a yega Guatemala miéntras e sobrá lo yega mañan. Pues pa djaluna 31 di mei ora e kalendario di FIFA inisiá, nos selekshon lo ta kompletu p’asina tin nan promé práktika ofisial. Preparashonnan ta kanando den ful swing pa nos siguiente kompromisonan di e partidonan di kualifikashon pa Mundial di FIFA. Despues di enfrentá British Virgin Islands nos lo topa Guatemala dia 8 di yüni aki na Kòrsou den Stadion Ergilio Hato pa 8 or di anochi. Si nos selekshon sali viktorioso di e dos partidonan aki, nos lo klasifiká pa e di 2 buèlta di e partidonan di kualifikashon ku lo tuma lugá dia 12 di yüni den eksterior i 15 di yüni 2021 na kas, kontra e ganadó di grupo D. FFK lo mantené pueblo di Kòrsou diariamente informá di tur desaroyo rondó di nos selekshon nashonal! Nota: E articulo ta skirbi den papiamento fonetico di Corsou.