Tjin-A-Sjoe: Ayudo di AVP pa partido politico MPB ta ‘storia di Compa Nanzi’

KRALENDIJK/ORANJESTAD  – E storianan cu lider politico boneriano Elvis Tjin-A-Sjoe (partido MPB) lo ta hayando ayudo di Aruba, y particularmente 40 hende pa e campaña electoral di su partido, ta ‘storianan di Compa Nanzi’. Asina e lider di e partido nobo di Bonaire, Movementu di Pueblo Boneriano (MPB) a sigura NoticiaCla.com diabierna atardi for di Bonaire. “Esaki ta tipico e modus operandus di (partido) UPB (Union Patriotico Boneriano). “Nan diasabra a yega!” Tjin-A-Sjoe a sigui bisa. Nada di e loke cu ta wordo insinua den su direccion, ta berdad. Tjin-A-Sjoe tabata corto den su declaracion, mirando cu e tabata den un reunion, pero a keda di elabora mas detaya riba e asunto aki.

ACUSACION DI MEP

Tabata den curso di dia awe cu partido di oposicion di Aruba MEP, a mustra den un comunicado riba e supuesto papel dudoso cu gobierno di Mike Eman ta hunga den e campaña electoral, y pa colmo cu placa di pueblo. Segun e partido MEP, “Partido UPB cu tabata e partido ruman di AVP pa hopi aña, awor ta sintiendo e traicion grandi di AVP, pasobra AVP a bira lomba pa e partido y ta sostene e candidato Elvis Tjin Asjoe, cu a kibra cu UPB”. E partido heel ta sigui bisa cu ‘no ta na Aruba so partido AVP ta conoci pa traidor, na Boneiro tambe nan ta traidor’. Nan ta bay mas leu, indicando cu minister di turismo, Otmar Oduber a habri campaña di Tjin Asjoe na Boneiro. Y finalmente, cu e mesun compania di mercadeo di Mike Eman ta yudando Elvis den campaña, y a hiba 40 hende Boneiro pa entrega lista hunto cu Elvis.

OTMAR ODUBER

Den caso di minister Otmar Oduber, e la desmenti categoricamente na NoticiaCla.com diabierna atardi, di tin cualkier envolvimento cu campaña di sr Tjin-A-Sjoe. "Mi por sigurabo cu esaki ta totalmente incorecto. No tin nada di berdad den esaki. No tin ningun planificacion den e politico y eleccion di Bonaire" Oduber a sigui bisa. E la confirma si cu entre e y Tjin-A-Sjoe, tin un amistad y a mustra den forma abierto su sosten como politico na Bonaire. "Pero hamas entremete den politico den ningun pais, menos Bonaire. Nos tin cu respecta nan autonomia". Riba e asunto di payroll tambe Oduber a sigura cu nada ta berdad di esaki. "Esaki ta absolutamente otro mentira. Sra Silvia Gildhorn cu na e momentonan aki ta trahando cu sr Tjin-A-Sjoe for di aña pasa, no ta riba payroll di gobierno (di Aruba), y no ta trahando cu gobierno (di Aruba). E la sigura tambe cu e mentiranan aki ta otro fabula, cuenta di Compa Nanzi cu ta wordo saca di Movimento Electoral di Pueblo y partido UPB, mirando cu nan no tin otro issues pa atende cune. 

UPB 

Tjin-A-Sjoe tabata forma parti di e partido UPB, pero a kibra cu nan algun aña atras ora cu e la wordo bisa cu mester a scohe. Y e la scohe pa bandona e partido y despues a forma su propio partido aña pasa, cu bista pa e proximo eleccion. A busca contacto cu e mandatario di turismo, pero no a logra esaki ainda. NOTA: E foto ta momento cu Tjin-A-Sjoe ta entrega su lista na Bonaire, acompaña pa su señora.