ATIA cu varios area di precupacion na Minister Bermudez durante reunion

ORANJESTAD – ATIA ta preocupa cu companianan cu ta cumpli cu tur ley no ta wordo recompensa siendo pa companianan malafide den pasado tabatin areglonan beneficioso y cu e punto aki ta algo cu mester tene den consideracion. Esaki lo por descurasha esnan cu si ta tene nan mes na reglanan. Esaki ta un di e puntonan cu nan a discuti durante un reunion reciente cu minister Finanzas Angel Bermudez. ATIA representando comercio, na varios ocasion a trece por escrito dilanti na e mandatario preocupacionnan reinando bou comercio y necesidad pa claridad. Segun Minister Bermudez pa varios motibo no a logra di atende ATIA su peticionnan debidamente y a splica esaki durante e reunion cu a bay den un ambiente ameno. Puntonan di agenda tawata: reforma fiscal y ATIA su participacion den e proceso aki; presupuesto 2015; CFT; introduccion di BAZV y ultimo desaroyonan financiero.

SPLICACION DI MINISTER

E mandatario a splica e retonan cu su departamentonan di impuesto y aduana ta enfrentando y ta hasiendo esfuerso pa wak con pa mehora servicio y cobranza. Minister ta preocupa cu ainda tin miyones di placa riba caya pa wordo cobra y cu lo mester bin pronto cu alternativa. 

BAZV

Encuanto e topico BAZV, ATIA a keda asombra cu niun hende a wordo consulta riba e contenido di ley aki. Claro lo tawata mas facil pa a djis hisa BBO cu un 1 porciento, scapando asina comercio hopi stress, mas gasto administrativo y a la bes gobierno lo a haya su placa mas facil. Minister Bermudez a indica cu hasta cumplimento cu BBO mes no ta 100 porciento y cu lo mester bay controla esaki miho. Segun representantenan di ATIA, un level playing field ta algo di suma importancia pa nos economia sino lo haya concurencia entre companianan cu no ta husto. Bou miembresia di ATIA ta biba e sentimiento cu no ta tur compania ta wordo controla manera debe ser.

REFORMA FISCAL

Penultimo a combersa riba posibel reformanan fiscal di cual ATIA ta wak cu hopi positivismo. ATIA pa varios aña ta boga pa un movecion di impuesto directo pa uno indirecto; ta boga pa un sistema di impuesto mas simpel y un cobranza mas eficiente di impuesto manera t’e caso na nos hermana islanan. E discusionnan aki lo sigui durante aña. Representantenan di ATIA a haci uso di e momento pa puntra Minister Bermudez over speculacionnan y rumornan cu BBO lo bay subi y/of cu un solidariteitsbelasting lo wordo introduci pronto, cual e mandatario a splica cu ambos di e speculacionnan no ta funda, pues no ta e caso. A discuti tambe e gastonan di aparato gubernamental cu ta haltisimo y kico ta plan di Minister pa baha esaki. Na final ATIA a extende un invitacion na Minister di Finansas y e la bay di acuerdo pa forma parti di un panel discussion hunto cu expertonan financiero y miembronan di ATIA riba e topico: reformanan fiscal y presupuesto 2015. Esaki lo tuma luga durante ATIA su reunion general anual (AGM) na fin di maart.