Reaccion politico riba paro di welga di hamber di Mike Eman

ORANJESTAD – Lider di fraccion di partido AVP Rene Herde no por a reacciona mesora na NoticiaCla riba e paro di welga di hamber di premier Mike Eman. "Nos ta den un reunion y asina nos ta cla nos lo reacciona" tabata palabra di Herde na NoticiaCla. Lider di partido Mep mientrastanto a reacciona pa medio di un comunicado diabierna mainta tempran. “Loke cu premier Mike Eman a logra cu su welga di hamber ta causa nos pais mas daño.” Esey ta e prome reaccion di lider di partido di oposicion Evelyn Croes diabierna mainta. Den un comunicado, e ta mustra cu e situacion ta mas pio cu antes, y cu de hecho, Eman no a cumpli su palabranan pa cu su welga. “E situacion financiero ya delicado a bira hopi mas serio pasobra no kier atende cu e problemanan mes. E crisis constitucional a bira hopi mas serio cu e atakenan di Eman contra Gobernador, atakenan baho y vil. E relacion cu Hulanda, cu tabata un di e puntonan di mas fuerte di Eman su gobernacion, awor ta destrui. Y e imagen di Eman tanto personal como politico, a wordo daña considerablemente, cual ta conta pa su partido tambe” Wever ta bisa.

 Wever ta mustra cu loke en todo caso Eman no a logra ta cu gobernador a firma e presupuesto y para e investigacion riba e presupuesto. “Eman a te hasta prohibi departamentonan di coopera cu e investigacion, algo totalmente for di lugar” Wever ta sigui bisa.

Motibo cu segun Wever, Eman no a logra su meta, tambe ta wordo describi pa Wever. “Mike Eman a cuminsa e welga di hamber pasobra Gobernador no kier a firma e presupuesto. Gobernador na su turno a keda para firme cu e no ta firma sin cu bin un investigacion”. E hecho cu gobernador no a firma nada, y cu CFT ainda tin e investigacion den su man, segun Wever, ta laga e pregunta atras, cu ta dicon Eman a para su welga di hamber. “Kiko el ‘a logra cu e welga di hamber” Wever ta bisa finalmente.

Na NoticiaCla, Wever a declara diabierna mainta, cu pa awor, e partido ta keda keto pendiente kico ta sali for di e investigacion preliminar di CFT.