Lo tin debate politico riba tema di medio ambiente na Cas di Cultura otro siman

ORANJESTAD -Aruba lo experencia su prome debate politico riba e tema di medio ambiente e biaha aki. Esaki ta keda organisa hunto pa varios instancia di medio ambiente.  Segun e organisacionan medio ambiental, plannan di maneho tocante nos medio ambiente ta instrumental pa nos pais, mirando cu esaki nan tin efectonan profundo riba nos bida y salud. Con nos ta trata nos medio ambiente ta impacta tambe nos economia turistico, cual ta depende di un medio ambiente sano y sostenibel. E infrastructura di nos pais ta mustra con nos no a tene cuenta cu nos naturalesa. E efectonan di nos maneho di desperdicio a resulta den e problema nacional di Parkietenbos. Con ta para berdaderamente cu proteccion di nos flora, fauna y bida marino? Con cambio di clima lo afecta nos isla y henter nos comunidad? 

DEBATE

Den e debate lo purba di trece dilanti e diferente retonan di medio ambiente cu Aruba ta enfrenta awendia y retonan cu nos lo enfrenta den futuro. 

Riba e anochi aki cada partido politico lo por trece nan vision, mision y solucionan riba cada tema padilanti. Asina e pueblo en general por saca afo si nan tin un plan balansa entre desaroyo economico y conservacion y proteccion di nos medio ambiente. Nos medio ambiente tin  balor sumamente importante, nos mes como comunidad mester pone mas atencion y precaucion y tambe responsabilisa nos gobernantenan pa e futuro di nos medio ambiente. 

KEN TA ORGANIS’E

E debate ta organisa door di un grupo di varios persona activo riba e tereno di medio ambiente entre otro e team di Aruba Life Organics, Metabolic Foundation y Zero Waste Aruba.  E temanan cu lo ta riba mesa riba e debate aki: ‘energia’, ‘maneho di desperdicio’, ‘cambio di clima’ y por ultimo ‘flora, fauna y bida marino’. Pa mas informacion por subi e pagina di facebook Debate Medio Ambiente.  Na  e debate tur protocol di DVG lo ta vigente y lo wordo renforsa.