Parlamento ta acepta mocion pa habri Corsou bek

WILLEMSTAD - Ayera parlamento den su totalidat a aseptá un moshon kaminda ta urgi gobièrnu pa habri Kòrsou bèk.

E moshon ta bisa ku parlamento di Kòrsou den reunion públiko di 17 di mei 2021 ku e tópiko: “Adaptashon di medidanan ku a ser imponé riba pueblo basá riba e lei di emergensia. Habri Kòrsou responsablemente ku reglanan balansá entre e sektor di Salubridat Públiko i Ekonomia”.

Konsiderando ku pueblo di Kòrsou a bin ta  mantené nan mes debidamente konforme reglanan stipulá dor di gobièrnu pa kombatí e vírus di COVID-19; a transkurí basta tempu nesesario pa analisá e efektonan di e medidanan tuma ku bon resultado; e efektonan di vakunashon, kaminda pa último dianan ta marka entre “0” pa “1” kontagio riba e promedio 700 resultado di tèst pa dia; e pueblo ta anhelá pa haña mas derecho i oportunidat pa rekreo liber i distraishon responsabel; mantené medidanan di prekoushon di distansia sosial, manera 2 meter, laba man, uso di tapaboka i demas protokòl, kódigo i reglanan vigente.

Ta disidí pa urgi gobièrnu demishonario di Kòrsou pa habri Kòrsou bèk, adaptando di un forma responsabel. Toke de keda te un mínimo di 1 or di mardugá, alabes dunando posibilidat pa alargashon di orarionan di trùk di pan, horeca, kasinonan i demas negoshinan, mirando ku kasonan di kontagio a baha; studia posibilidat ku por hasi eventonan musikal, kultural, den airu liber (ménos húmedo) segun e pèrmitnan otorgá den forma responsabel; kontròl mas severo na aeropuerto dor di introdusí un tèst rápido; studia e posibilidat i huntu ku un protokòl, habri oportunidat pa kas di grandinan i detenidonan risibí bishita di nan sernan kerí. Por último sigui ku e kontròl nesesario riba kumplimentu ku e reglanan stipulá.

Sr. Charles Cooper ku a entrega e moshon a bisa ku ta pidi pa habri bek, debí na “0” kaso di kontagio i tin tiki kaso na hospital. Manera ariba indiká parlamento kompleto a aprobá e moshon aki. Ta usa papiamento fonetico di Corsou.