Corsou tres dia sigui na 0 contagio di Covid-19

WILLEMSTAD – Sin duda algun mester indiká ku e trabou ku e Tim di COVID ta realisando huntu ku e tim di vakuna a duna su resultado. Pero sin e tremendo komportashon di komunidat,   no por a logra baha e sifranan di kontagio ku e vírùs di COVID na e nivel ku el a baha na e momentunan aki. Analisando e sifranan for di djadumingu 23 di mei te ku ayera ta solamente 1 kaso nobo di kontagio Kòrsou a registrá.

Siman pasá for di 16 i mei te ku 22 di mei Kòrsou a registrá 22 kaso. Pa e último tres dianan Kòrsou no a registrá niun kaso nobo di kontagio ku COVID-19, loke ku ta di aploudí. Pues ayera un biaha mas for di 987 persona ku a tèst no a sali niun kaso nobo.

Te ku ayera 12 persona a sali for di isolashon. E kantidat di persona ku ta hospitalisá ta 19 di kua 9 ta risibí kuido intensivo. Pa loke ta trata e último aki, ta indiká klaramente ku e proseso di rekuperashon ta bai poko poko.

E kasonan aktivo te ku ayera a baha te na 33. Pa loke ta trata mortonan, t’asina ku despues di dia 19 di mei, no tabatin persona ku a fayesé konsekuensia di COVID. E sifra pa e último 8 dianan a keda na 122 kaso.

Tur kos ta indiká ku e kantidat di personanan vakuná ku na e momentunan aki a yega 83.676 persona ku a risibí nan promé vakuna, ta yuda tene e kontagio ku e vírùs di COVID-19 konsiderablemente abou.

Na e momentunan aki tin 85.503 persona registrá, loke ta trese kuné ku tin 1.827 persona ku durante e dianan benidero lo pasa nan promé vakuna.

E kantidat di hendenan ku a risibí nan di dos vakuna, tambe ta subiendo, ounke poko poko, pero e sifra a yega na 65.011 persona ku a risibí nan di dos vakuna. Total vakuna apliká ta 148.687.

Komunidat di Kòrsou ta sigui vakuná, sea ku un sita òf esnan ku ta kana drenta i vakuná. Por walk-in na WTC i SDK di djaluna pa djasabra i pa esnan ku tin un sita kaba i ke vakuná riba un fecha mas promé ta posibel.

E programa Bibando Den Bario ta brinda tambe e posibilidat pa abitantenan por haña informashon i vakuná den nan propio bario. Ta usa papiamento fonetico di Corsou.