Polis investigando hincamento na EPB San Nicolas

ORANJESTAD – Polis ta investigando hincamento na EPB San Nicolas. "Pa loke ta e caso, mi lo no por bisa nada, debi cu tin un investigacion penal andando di parti nos coleganan di Jeugd en Zeden Politie. Nan ta scuchando sospechosonan y testigonan den e caso lamentabel aki. Esaki no ta cos di mucha mas, sino ta trata aki di delitonan criminal y cu tin consecuencia pa esunnan cu haci nan mes culpabel", vocero di polis Lito Lacle a enfatisa. Di otro banda, e mesun departamento cu e ta encabesa den e organisacion policial tabata masha activo ultimo aña, cu tur sorto di charla, tayer y anochinan di informacion. Un di e temanan cu mas ta duna atencion ta "bullying", "peer pressure" den grupo y hopi tema mas cu ta masha comun bou di hubentud.

Separa di e departamento di prevencion, nan ta haya sosten di Polisnan di Bario cu den forma activo tambe ta envolvi cu diferente scol den tur districto. No solamente nan tin contacto directo y permanente cu directiva di e scolnan, sino nan mes ta actua tambe den caso di delitonan of mal comportacion. E mesun Polis di Bario, tradicionalmente un Polis cu mas experiencia den e trabou, ta organisa charlanan di prevencion den klas pa asina papia cu e studiantenan y mustra nan riba consecuencia di nan actonan.

EPB San Nicolas por ehempel ta haya atencion special y adicional di Polis, debi na multiple casonan y kehonan entrega di parti studiantenan, nan mayornan y hasta di docentenan. E situacion na e scol ta rekeri extra atencion di autoridad, no solamente cu man duro pa pone ordo, pero den un esfuerso mas social tambe pa purba haya e studiantenan riba un miho caminda den nan bida.

Den e cuadro aki a opta pa tur dialuna duna un man activamente na e "Naschoolse Opvang" di EPB San Nicolas. Despues di scol a pone extra patruyanan di Polis den e area, cu ta inclui presenta tambe di Polisnan riba brommer y e ekipo di cachonan K-9. Claro cu tur esaki ta mara na disponibilidad di e patruyanan na e momento ey.