Dama turista ta hoga na Shark Bay

ORANJESTAD - Awe pa mas o menos 5:50pm central di polis ta wordo notifica cu un dama turista lo tin problema den lama na Shark Bay. Diferente unidad di polis a bay na e sitio di e susedido y na unda na nan yegada a pidi di biaha pa ambulance y brandweer. Por a bin compronde cu aparentemente e dama turista lo a bay den lama y na un dado momento a haye den problema den awa.  E tour guide y tambe un amigo di e turista a purba pa yude pero nan mes a hayanan confronta cu problema den lama. Dos otro persona a logra saka e dama turista y e tour guide. Nan a duna e dama turista CPR pero no por a haci nada mas pe. Na yegada di personal di ambulance tambe a purba di re-anime pero Lamentabelmente e dama turista a fayece. E personal di brandweer tambe a yega na e sitio pa asina yuda e turista cu a keda riba un baranca sin por yega canto door cu e lama tabata basta bruto. Na un manera tactico personal di brandweer a logra pa sake e turista masculino for di lama y personal di ambulance a trate y hibe hospital pa un chekeo medico.Na e sitio a presenta departamento di recherche, fiscal y tambe slachtofferhulp.

Pa 7:35pm Dr.Texiere ta constata morto di Melissa Carrasco di 29 aña di edad nacionalidad mericano. Di parti Cuerpo Policial Aruba nos ta manda palabra di condolencia na e famia di e fayecido. Potret cortesia KPA.