Segun encuesta, grupo di indeciso por determina resultado di eleccion

ORANJESTAD – Segun e ultimo encuesta di noticiacla y doc opleiding, un grupo di persona ainda indeciso por determina e resultado di eleccion. Asina mes, Aruba lo por haye cu un gobierno di coalicion atrobe, pero e biaha aki entre un partido grandi y dos pa tres partido chikito nobo.  Pero loke ta resalta  ta e grupo di persona indeciso unda cu 10% ta bisa cu faltando un luna pa eleccion, ainda nan no sa cua partido nan vota. Y mientras cu e resultado presenta, ta duna victoria na un partido grandi y varios otro partido chikito, e grupo aki por bolter tur cos. Tambe, den e encuesta aki, claro cu e informacion cu mas hende ta pendiente di dje ta: Cua partido(nan) lo a haya mas voto a base di e encuesta aki, y cua partido lo keda y of drenta Parlamento a base di e resultado aki? 

INDECISO

Pa hende cu a scoge nan partido caba, e informacion por duna indicacion unda nan partido ta para. Pero, manera NoticiaCla y Doc Opleidingen a raporta caba dialuna, tin un grupo di 10% cu ta indica cu nan no sa ainda kiko nan lo vota. E 10% ey ta un bloke cu ta representa 2 asiento den Parlamento, pues tur partido lo tin wowo riba nan. E por significa e diferencia pa yega e kiesdrempel, of e por bolter pa 1 asiento adicional. E grupo di hende indeciso ta indica cu 60% di nan no tin suficiente informacion di e partidonan general y cu 50% di nan no tin suficiente informacion kico nan partido prefer ta para p’e. Un total di 81% di e grupo aki ta indica cu informacion y plannan di e partidonan lo yuda nan tuma nan decision. E grupo di hende indeciso a indica cu nan lo no vota manera famia semper a vota (mas cu 97%), y  mientrastanto 46% no sa ainda si nan lo deposita nan voto pa mesun partido pa cual a vota na 2017, y 54% ya a indica cu nan lo no vota pa mesun partido. E grupo di persona indeciso ta parce di ta un grupo cu ta reparti riba henter Aruba, di diferente edad y dividi entra hende femenino y masculino mas similar cu e estadistica di Aruba. 

CON PA DICIDI PA KEN VOTA

E encuesta tambe a duna informacion con hende ta evalua pa ken nan lo vota. Un total di 94% di esnan cu a participa ta indica cu bandera y sticker no ta parti di nan evaluacion. Un total di 63% a indica cu nan tin un bon idea general kico cada partido lo kier haci, y tin 83% cu tin un partido preferi caba ta indica cu nan sa kico nan partido ta para p’e. Awor e lo bira interesante pa wak con e partidonan lo ahusta nan mensahe y comunicacion pa mihor informa e grupo aki. 

 E POPULARIDAD DI E PARTIDONAN

1.      MEP                             37.84%

2.      AVP                              15.29%

3.      Mi no sa ainda             9.98%

4.      MAS                             8.15%

5.      RAIZ                             7.26%

6.      CURPA                         5.14%

7.      Mi no ta bisa                 4.84%

8.      ACCION21                   4.55%

9.      PPA                              2.18%

10.    RED                             1.30%

11.    OTRO                           1.24%

12.    UPP                              0.94%

13.    POR                              0.71%

14.    HTC                              0.47%

15.    PUEBLO PROME         0.12%

NOTA DI REDACCION: 

Un encuesta online ta bai lihe pero e tin su limite. Mientras cu e encuesta aki ta pidi informacion demografico pa por compara ken a responde compara cu e poblacion di Aruba, no tur hende ta yena esaki completo y no tin forma di controla si tin hende cu a yena informacion fout. Tin e tendencia cu un grupo cu ta sostene un cierto partido, ta dicidi pa no participa na e encuesta, cu por tin su efecto tambe. Tambe, NoticiaCla ta consiente cu esaki ta e resultadonan di su lectornan/usadornan, dus lo no pretende cu esaki ta in refleccion di e poblacion di Aruba en general.   Den 3 dia cu e encuesta tabata habri 1695 hende a tume tempo pa yena esaki.