Lampe: Nenga independisa scolnan publico tabata un blunder di Parlamento

ORANJESTAD - Nenga independisa scolnan publico tabata un blunder di Parlamento. Asina minister di enseñansa Rudy Lampe a bisa e siman aki durante un conferencia di prensa. Segun e mandatario, e ta referi na un di e proyectonan cu ta pendiente pa e siguiente gobierno cu ta independisacion di scolnan publico. El a recorda loke cu a pasa den Parlamento na april di 2018 y cual e ta cataloga como un blunder di e organo aki. Segun sr Lampe, den un sesion 20 parlamentario a vota contra independisacion di scolnan publico y solamente Ricardo Croes a vota na fabor di e conseho aki. “Awo a haya rapport di Departamento di Recurso Humano cu ta mustra cu e departamento di Scolnan Publico ta un caos. Si Parlamento tres aña pasa a tuma e decision corecto, e interes di e maestronan lo tabata miho sirbi. Centenares di dossier di personal di scolnan publico (docentenan) no ta actualisa. Pa motibonan politico Parlamento a bay contra, sin preocupa cu interes di e maestronan. Un docente (maestro) satisfecho, ta sirbi nos muchanan di un miho forma,” e mandatario a bisa. 

LAMENTO

Esaki ta hustamente loke el a propone na 2018, segun e mandatario. E sistema cu el a propone ta igual na tur parti di Reino Hulanda y cual pa motibonan politico a bay contra e proposicion aki. E ta lamenta cu hustamente docente y maestronan den Parlamento manera Jennifer Reyes, Marlon Sneek, Edgard Vrolijk y Sue Ann  Ras a bay contra su proposicion. Esaki mientras cu nan tur ta traha pa un Stichting y no den un Scol Publico. \“Nos ta spera cu pueblo duna apoyo na e maestronan riba lista pa traha pa mehora enseñansa na Aruba,” el a bisa.