Kock: No ta irealistico pa pensa cu Sevinger su detencion inicial lo dura largo

ORANJESTAD – Tanto Parlamentario Benny Sevinger como su casa Claudia, a keda deteni diaranson atardi. Y nan lo por keda deteni por lo menos pa e proximo dos dianan. Asina e abogado cu ta representa e pareha, mr David Kock a confirma pa noticiacla.com diaranson atardi. Manera ta conoci e pareha a keda deteni diaranson mainta separadamente y ta encarcela na dos diferente warda, esta na warda di Noord (e senjora) y na Macuarima (Benny Sevinger). 

CARGONAN

Ta sospecha e parlamentario di e.o. soborno di ambtenaar, falsificacion di firma y labamento di placa, y cu e lo ta pertenece na un organisacion criminal. Ta keda na Ministerio Publico pa prueba e acusacionan aki. Pa ta permanece na un banda criminal tin castigo di 12 anja mientras cu e otro cargonan por varia di 4 anja di castigo di prison of mas. Pero ta depende di e circumstancianan cu lo por determina si e ta wordo haya culpable, kico e castigo final lo ta. Pero e abogado ta sali for di punto di bista cu e clientenan ta inocente. 

EMBERGADURA GRANDI

Segun abogado Kock, ta considera e caso aki uno di embergadura grandi, pa cual a dura casi 3 anja pa conclui e parti investigativo. Pues si e investigacion mes tabata asina largo, por compronde cu lo tuma sigur sigur varios siman pa trata e caso aki legalmente pa su clientenan. E abogado ademas ta sospecha cu Ministerio Publico lo pidi pa sr Sevinger keda deteni pa un periodo largo. Pero un huez lo tin cu determina si e detencion ta hustifica. Esaki por tuma lugar den varios di e facetanan. Pero ta premira cu e detencion pues por dura largo y cu Sevinger por keda deteni te despues di eleccion. E abogado pues no ta considera esaki un posibilidad irrealistico. 

E CASA

Manera indica caba, e senjora di sr Sevinger tambe ta deteni y mr Kock ta defende e senjora tambe den e caso aki. E senjora a keda deteni separadamente, y segun e abogado, a detene e senjora pa e mesun caso (Avestruz) aunke cu tin ‘solamente’ un cargo cu ta sospecha e senjora di dje, cu ta labamento di placa. Pues no a detene simplemente pa evita cu e senjora por sigui influencia e caso sin mas, y cu door di detene, evita cu e por ‘papia’. No, e ta wordo sospecha di ta parti tambe di e caso. Y e hecho cu sr Kock ta representa ambos persona, no mester ta un problema di conflicto di interes aunke nan ta deteni na dos diferente warda. Mr Kock tabata sorprendi si pa e hecho cu a detene e senjora tambe, pasobra no tabatin necesidad segun e abogado, pa e detencion aki, y e abogado ta considera e detencion como tal completamente innecesario. 

DETENCION LARGO 

Den e prome dianan, autoridad tin basta espacio pa maniobra y den e prome dianan ta ‘toets’ un detencion hopi leve mes, si e tabata na su lugar of no. Ta segun e dianan sigui, ta bira mas cla si e detencion ainda ta necesario of si mester laga e persona den libertad. Por lo pronto, e abogado lo ta completamente ocupa mirando cu e ta representando un persona caba den e mesun caso di Avestruz, y a pasa varios dia na Landsrecherche. Esaki no lo ta diferente awor, y ta premira cu lo tin dianan largo su dilanti unda cu e tin cu ta presente pa su dos clientenan actual. Pa loke ta su Inocencia, te awor e abogado no ta mira ningun motibo pa duda den inocencia di su clientenan. E ta mira e caso hopi grandi si y complica y cu hopi dato cu tin cu repasa, pero esey no ta nifica cu su cliente lo a comete un acto castigabel pa cual e mester bay cera. 

ELECCION

Cu e detencion di sr Sevinger premira pa ta uno largo, y posiblemente te despues di eleccion proximo, e ta trece un situacion interesante. Esaki pasobra sr Sevinger ta aparece riba e lista politico di partido AVP como number 29. Legalmente, e por participa den e eleccion y su nomber lo aparece riba e lista aunke si e ta deteni ainda. Pues, siendo un detenido, e lo por haya voto riba dia di eleccion. Loke e no por haci, dado caso cu AVP gana eleccion y sr Sevinger haya suficiente voto pa saca su mes, cu e lo por haya un posicion di minister e biaha aki, si e oportunidad ey presenta.  Esaki pasobra den e situacion cu e ta aworaki, e lo no por pasa screening pa minister (si e haya e posibilidad ey). Ta solamente unabez cu e caso bin dilanti, y cu huez declare inocente, cu sr Sevinger por bira un minister atrobe, si e posibilidad aparece. Pasobra otro realidad ta cu esaki ta un eleccion pa Parlamentario y no pa minister. Pues pa aworaki, mester lubida e posibilidad pa sr Sevinger su chensnan pa bira un minister atrobe. Esaki ta interesante mirando cu apenas algun dia e parlamentario a saca un video primintiendo cu e prome 100 dia si AVP gana eleccion, lo tin un rotonde na Palm Beach, indicando cu e lo a haya e funcion atrobe di minister di infrastructura. Pero cu sr Sevinger deteni of no, no necesariamente ta nifica cu si AVP gana eleccion y sinta como e gobierno na mando, cu e 'promesa' aki, por bira realidad. Y asina tin mas scenario cu por pensa ariba, relaciona cu detencion di e parlamentario y e efecto cu e lo por tin riba su situacion electoral.