Premier di St Maarten a subi avion pa Hulanda pa bringa Knops pa haya ayudo di likides

PHILLIPSBURG – Prome minister di St Maarten Silveria Jacobs a subi avion pa Hulanda diamars pa bay atende e asunto di likides personalmente cu secretario di estado Hulandes Raymond Knops. Esaki pasobra e prome minister ta sigui pensa cu sr Knops ta sigui wanta e placa den un forma illegal, cu ta aproba caba pa conseho di minister di Reino for di 23 di April ultimo. Mirando cu ta tardando, e y e minister di finanza a subi avion y bay atende e asunto. Sr Knops mes tabata na St Maarten siman pasa ainda, y a insisti riba e paro di pago, mientras cu di otro banda e ta papia di ta preocupa pa e pueblo di e isla. “E actonan di e secretario di estado ta contra productivo ya cu ta pone e proceso vital di gobierno den peliger. Como consecuencia, nos mester cuestiona su motibonan” e mandatario a bisa. “Como prome minister mi no tin otro escogencia cu escala e asunto aki cu e conseho di minister di reino. E intencion ta pa logra convence conseho di minister di Reino pa logra pa St Maarten haya su placa. E mandatario di St Maarten lo ta presente tambe den e debate plenario di 1 di juni proximo pa atende e asunto di geschillenregeling den Eerste Kamer.