Premier Wever evaluando pa entrega keho penal contra parlamentario Sevinger

ORANJESTAD – Prome minister Evelyn Wever Croes ta evaluando pa entrega un keho penal contra parlamentario Benny Sevinger pa acusacionan contra e prome mandatario. Asina e prome mandatario a declara publicamente diaranson mainta despues di detencion di sr Sevinger den e caso Avestruz. E motibo di e denuncia ta pasobra sr Sevinger ta acusa e prome mandatario di a bende un tereno di pa 17 miyon dollar. Algo cu segun e prome mandatario, ta desmenti. 

PROME REACCION PROME MINISTER 

“ Mi a tuma nota cu awe Ministerio Publico a detene ex minister y acutal candidato pa partido ASVP sr. Benny Sievinger, den cuadro di caso Avestrus. Esaki despues di a detene varios persona sospecha di ta su complice den caso di corupcion, labamento di placa y falsificacion di documento. Acusacionnan grave contra un politico y ex minister. Locual cu mi ta lamenta ta cu den su desesperacion, e ta acusa ami di a bende un tereno di Waterpark pa 17 miyon dollar” e mandatario ta cuminsa na bisa. “ E acusacion aki ta totalmente falso. Ami nunca tabata tin otro propiedad cu esun cu mi ta biba aden, y nunca mi a bende ningun otro propiedad, y sigur no pa un suma di placa asina. Partido AVP tin algun dia caba ta lansa mentiranan den mi direccion. Siman pasa tabata candidato Selene Kock, cu a ganja cu mi a yama Hulanda p’e, siendo cu nunca mi a hasi esey; despues Gerlien Croes cu a ganja cu Hulanda no a exigi cortamento di 5 miyon florin den cuido di salud, siendo cu tur documento ta prueba esey; despues ta nan matutino ta ganja cu ami no kier a ricibi sr. Pisas, siendo cu sr.Pisas nunca a pidi un afspraak cumi; despues Mike Eman himself cu ta ami a manda polis para su actividad cu a sali for di man, siendo cu e sa cu ta e mes a viola tur regla y cu Cuerpo Policial ta actua independiente; y awor ta Benny Sievinger cu mi a bende un propiuedad pa 17 miyon dollar. Ademas, si di berdad e tin un prueba contra mi, puntra bo mes dicon nunca e mes no a entrega prueba. Bo sa dicon? pasobra e sa cu e ta ganja. Esaki ta simplemente un mentira mas, ban  wak ta cu cual mentira nan ta bin cun’e mayan. Mi a pidi mi abogado studia e posibilidad di entrega keho penal contra dje, maske mi sa cu e tin suficiente acusacion penal caba, y mira si por exigi un rectificacion” e mandatario a finalisa bisando.