Parlamentario Benny Sevinger a keda deteni awe mainta

ORANJESTAD – Awe mainta landsrecherche a detene ex minister y parlamentario Benny Sevinger (AVP) pa e caso di Avestruz. Vocero di Ministerio Publico Ann Angela a confirma e informacion pa noticiacla. Mientras cu na inicio di e detencionan di otro sospechoso, tabata busca e sospechosonan na nan cas mainta tempran, den e caso aki esey a bay diferente. Sr Sevinger tabata na radio Magic FM awe mainta ainda den un entrevista, y despues a bay bebe coffee cu su amigonan na un lugar den De La Salle Straat y eynan ta unda cu nan a pone man riba dje y a bay cune. Sr Sevinger ta e sospechoso principal den e caso aki unda cu ta investigando possible caso di tereno di gobierno cu lo a bay illegal entre 2009 y 2017. Fuera di Sevinger, tin por lo menos 4 persona deteni ainda, cu ta Leoncita A, Freddy E, Franklin A, y Pieter S.