Na Corsou, condena pa asesinato Spoonz a keda parsialmente mescos den Corte di Casashon

WILLEMSTAD.- Ayera  korte di kasashon a dikta sentensia den e kaso di asesinato ku a tuma lugá den e mardugá di 24 pa 25 di yanüari 2018, na altura di e diskoteka e tempu  ei  Spoonz den Lindbergweg Saliña. Un di e linianan kòrá ku tabata kore den e kaso aki ta apelashon riba defensa propio i esaki a keda tres’é tambe na Korte di Kasashon, pero ku e tribunal no a honra.

Riba e dia menshoná e víktima  Jeangianno Zimmerman (24) a pèrdè  su bida, despues di a risibí un bala den su kabes. Ministerio Públiko a akusá David Statie komo kómplise di su amigu J.J. ku ta esun ku a lòs e tiru fatal riba e víktima. J.J. te awe no a wòrdu lokalisá i ta deskonosí pa hustisia. Den e mesun kaso aki korte a trata intento di asesinato riba e akusado David Statie (42) ku a bira víktima di e tiroteo dor di a pèrdè un pia i tambe riba J.J.

Pa ku e kaso di Statie i J.J,  Ministerio Públiko ta akusá Celio Balentina i Laker pa intento di asesinato riba ámbos akusado.  Den korte di promé instansia Laker a ninga di tabata sa algu di e tiroteo. Pero durante tratamentu di korte di apelashon, el bisa ku e ta atmití di tabata na e sitio pero no a usa niun arma. Segun Laker, ora ku el a sali pafó, tabatin un hòmber tur na pretu pará serka Zimmerman. Mas aleu el a splika ku bèrdat el a kòrta su kabeinan ora el a yega kas, pa motibu ku e no konos’é e  hòmber ku tabata huntu ku Statie i ku tambe a tira.

P’esei pa miedu el a kòrta tur su kabeinan. Riba esaki Abogado General a bisa Laker ku nan a wak e video na vários okashon i niun bia nan no a mira niun hòmber bistí na pretu. Abogado General a haña e akusashon por keda probá i a bisa ku e ta haña e kastigu di 8 aña den korte di promé instansia na su lugá. El a splika ku e diferensia ta ku Laker no tabatin un arma pero a kue un arma ku a keda bentá abou i kuminsá tira. Kontrali na Balentina Abogado General a splika ku el a bin ku un arma prepará i a basha bala. Abogado di Balentina ku ta mr Larmonie, a bisa ku su kliente a usa defensa propio sino aworakí Balentina lo tabata morto òf den un ròl stul.  NOTA: E texto ta scirbi den papiamento fonetico di Corsou.