Parlamento di Corsou a aproba e lei pa amtenaarnan baha ku VVU

WILLEMSTAD - Ayera parlamento den su totalidat a aprobá e lei pa ámtenarnan por baha ku VVU e “Landsverordening

vervroegd vrijwillige uitstroom”. Esaki ta nifiká ku alrededor di 608 ámtenar por baha ku penshun adelantá. Esaki ta entrante 1e ougùstùs 2021 i ku tin un prolongashon di un aña, ougùstùs 2022. Tambe parlamentu a aprobá un moshon kaminda ta pidi e gobièrnu/minister enkargá ku BPD pa kada 6 luna informá parlamentu di desaroyo dje lei aki.

Parlamentario Maria Pauletta a indiká ku nan frakshon di PAR a presentá e moshon aki ku e intenshon pa trese i mantené klaridat tokante e proyekto di lei aki. Un dje tareanan di parlamento ta di kontrolá gobièrnu. Pa medio di e moshon, parlamento ta urgi gobièrnu pa mantené parlamento na altura kon e proseso di VVU ta kana na bienestar di e miembronan di e aparato públiko. E ta kontentu ku e sobra miembronan di parlamento a mira e importansia dje moshon i a firma esaki huntu ku frakshon di PAR. E moshon ta duna seguridat na e empleado públiko ku hasi petishon pa VVU, i ta bai baha, ku parlamento tin wowo riba e proseso aki i desaroyo ku tin di aber ku e lei aki.

E parlamentario di frakshon di PNP, sr. Sheldry Osepa a duna di konosé ku ta bon pa e ámtenar ku ta bai hasi uso di VVU ta bon informá. Esaki ta un bon kuminsamentu, kaminda partido PAR a bin ku un moshon, i a yega na otro na bienestar di pueblo.

Pa sra. Giselle Mc William e dia di ayera tabata un dia di hubilo mirando ku un lei asina importante a toka na minister Armin Konket (MAN) a presente i ku henter sala a bai di akuerdo na bienestar dje ámtenar. E mekanismo di kontròl ku parlamento mester bai hiba pa loke a keda akordá den e lei ta keda biba. E kos mas importante ta ehekushon ku e kontròl ku mester ser hasí. E ehekushon pe lei kana manera e mester ta, na bienestar dje ámtenar, ta den man di e próksimo gobièrnu.

Sr. Gilbert Doran di su banda tambe a ekspresá ku e moshon di frakshon di PAR ku a haña sosten total den parlamento ta un bunita komienso. E moshon ta na su lugá despues di a hasi algun ahuste chikí. E kontròl ta primordial pa keda ehersé, segun e parlamentario.

E moshonnan ta bisa: “ku e meta prinsipal di e proyekto di lei VVU ta pa baha gastu di personal di gobièrnu; ku despues di publikashon di e lei, 608 empleado públiko lo por bin na remarke pa baha ku VVU, lokual ta 16% di e total di empleadonan públiko; ta importante pa parlamentu keda altanto di desaroyonan ku tin di haber ku bahamentu di gastu struktural i e strategia di personal di gobièrnu; ta importante pa parlamentu keda informá strukturalmente riba desaroyonan ku tin konsekuensia pa e servisio ku komunidat ta rushi di e aparato públiko. Ta disidí pa urgi gobièrnu pa kada 6 luna, informá parlamentu di Kòrsou por eskrito riba e desaroyonan rondó di e proyekto di lei VVU, inisiando 1 ougùstùs te ku ougùstùs 2022 i kuantu empleado públiko, den kua funshon i ministerio a hasi petishon pa VVU, i kuantu di e petishon aki a keda honra.

Finalmente e moshon tambe a keda aprobá ku voto general. NOTA: E texto ta scirbi den papiamento fonetico di Corsou.