Jan ten Hove: Entrenamento militar riba beach ta normal pero sa ‘lanta stof’

ORANJESTAD – E loke cu turistanan na Rodgers Beach a experencia e siman aki ora cu soldatnan a subi tera diripiente, tabata un simple entrenamento. E grupo di turista cu tabata drumi na beach, a haya un sorpresa di nan bida ora cu diripiente soldatnan a subi tera y cuminsa core cu nan arma. “Algo normal cu ta sosode mas frecuente cu antes” Comandante di Marinierskazerne Jan ten Hove a confirma na NoticiaCla.com. E ta admiti cu porta e mariniernan (bisti como soldat) lo mester a identifica nan mes y splica e turistanan kico tabata pasando. “Nan tin mi permiso pa haci tal. De hecho, nan tin e obligacion pa haci ‘e”.

Segun ten Hove, nan ta purbando (desde cu e tin e mando na 2013) pa uza e zona maritimo costal pabou nos isla mas como nan zona di entrenamento. “Tanto pa mustra nos presencia. Algo cu semper nos ta regla cu Warda Costa” ten Hove a bisa. E ta compronde cu e hecho cu algun aña caba nan no ta haciendo esaki, cu e ta algo nobo pa hopi hende. Consecuentemente e por crea un situacion di panico ora cu turistanan diripiente mira cierto movecionnan riba beach. A haci e tipo di entrenamiento caba riba Eagle Beach aña pasa. E tin tur di haber pa mustra nan visibilidad pa no solamente esnan riba e isla, sino tambe pa tur otro manera paisnan suramericano. “Nan tin cu mira cu nos tey”.

E comandante a admiti tambe cu nan sa tende di keho. Sigur ora cu nan nabega mucho duro y rapido banda di e costa di Aruba. “Nos sa haya keho di p.e. Zeerover (Restaurant) ora cu nos bay mucho duro. E botonan ta crea olanan e ora. E no ta algo nobo” e comandante ta bisa. Si pe, 90% ta positivo di e situacion, e ta contento. “Pero cada keho nos ta tuma serio y den mi forma di wak cos, nos tin cu simplemente splica hende kico nos ta haciendo”. E ora e ta resolve e situacion hopi mas miho.

E otro tipo di entrenamento ta esun cu tiramento. Esey ta wordo teni na lugarnan mas aleha y ta wordo avisa debidamente tambe cu aviso sea den corant of otro forma. Esey ta wordo haci cu arma cu ta peligroso, y eynan no tin hende otro cu no ta militar. A usa e areanan isola manera Vader Piet. “Ta conoci cu esey ta e teritorio pa tiramento. Eynan Warda Costa tambe ta tira. Tambe tin e area di Arikok. E ta aleha y for di poblacion regular”.

E entrenamento di beach ta otro, y ta mas poni pa hende wak kico tur e mariniernan por y ta capaz. Algo cu antes tabata sosode hopi mas, despues menos y awor ta mas. E intencion ta pa por tin entrenamento mas frecuente usando blanconan strategico manera aeropuerto, waf y tambe otro sitionan di crucial importancia.

Tabata ayera cu NoticiaCla.com a raporta riba un entrenamento militar e siman aki cu a spanta un grupo di turista mericano cu tabata disfruta di nan vacacion na Aruba. “Nos tabata relax y diripiente esaki” un turista a bisa, refiriendo na e cantidad di militar cu diripiente a subi tera na Baby Beach. “Nos a puntra e soldat, pero no tabatin contesta” e turista a sigui bisa. Algun a hasta kere cu tabata relaciona cu e avion cu a wordo derumba siman pasa serca di Aruba. “Mi potretnan di paz y trankilidad a converti den potret di invasion” e turista particular aki a bisa. 

Netamente e siman aki un ciudadano cu ta biba den e area ey, a manda un remetido cu keho riba e asunto di entrenamiento aki. "A yama Kustwacht pa informa nan di e suceso aki y pa sorpresa e contesta tawata cu Kustwacht no ta na altura di esaki y cu mester jama Polis pa denuncia esaki. Pues a yama Polis di San Nicolas y e contesta tawata; cu “ya diferente hende a yama caba y cu e tiroteo aki ta trata di un training”. e persona aki, cu a firma como Melva Yanes, a bisa. Segun Yanes, otro habitante di Seroe Colorado a comenta cu militarnan tawata train for di atardi caba banda di costa pabou di Rodgers Beach y por a wak 3 boto di marina ta nabega riba lama y cu por a tende sonido di tironan fuerte tambe. " Remarcabel ta cu no a duna aviso adelanta na e habitantenan cu e training aki lo a bay tuma luga y cu lo tin zonido di tiramento involvi."