Resultado preliminar di encuesta:10% no a dicidi ainda pa ken vota

ORANJESTAD – Segun resultado preliminar di e encuesta di NoticiaCla/Doc Opleiding cu a inicia awe mainta 25 di mei, esaki ta duna informacion interesante pa cu e grupo cu e responde cu nan no sa ainda pa ken pa vota. 

PROME RESULTADO

A base di poco mas cu 1000 participante cu a vota te cu merdia, 10% ta indica cu nan no sa pa ken vota ainda. Di e grupo aki, cual ta suma hasta 2 asiento den parlamento, 98% ta indica cu nan lo no dicidi kico nan lo vota a base di propaganda di bandera y sticker. Esaki ta poco mas halto cu e total di tur cu a participa te awor na e encuesta (97%).

INDECISO

E grupo indeciso (no sa ainda pa ken vota)  ta indica cu 64% no sa bon kiko cada partido ta para p’e (compara cu 64% cu si sa, di tur respondents). Di esnan cu tin un preferencia pa un partido ainda 51% ta indica di no sa precies kico e partido ey ta para p’e. Esaki ta importante,pasobra casi 81% di undecided ta indica cu e planes y ideanan di un partido ta yuda pa evalua pa ken pa vota. 

VOTA TRADICIONAL

E grupo aki no ta vota ‘tradicional’ siguiendo famia. Ya caba di tur cu a participa te awor, solamente 10% ta vota tradicional siguiendo famia, den e indeciso 97% lo no vota tradicionalmente loke famia a vota. 

COMPARACION

Compara cu 2017, e grupo indeciso lo no vota pa mesun partido e biaha aki: mas: 57% ta indica cu nan lo no vota manera biaha pasa mientras cu 42% ta indica cu nan no sa ainda si nan lo vota pa mesun partido. Esey ta full diferente di tur participante te awo, di cual 51% ta indica cu nan lo vota mescos cu na 2017 y 40% lo no vota manera 2017. E grupo di indeciso no ta desvia hopi pa cu edad y bario compara cu tur participante te awor. Loke si ta interesante ta cu den tur participante te awor, 38% tabata femenino vs. 62% masculino, pero den indeciso ta 48% femenino vs. 52% masculino, indicando cu tin relativamente mas damas cu no a dicidi pa ken pa vota, ainda. 

KICO POR SPERA

Eleccion cu ta bin tin 12 partido cu ta haciendo todo por todo pa convence publico pa vota pa nan. Informacion cu e votador ta pidi for di e resultado preliminar ta: "Dunami informacion pa asina mi por wak kiko bo ta para p’e. No mandami sticker of core cu bandere: esey lo no yudabo. Y no asumi cu, pasobra mi famia a vota pa bo partido den pasado, mi lo sigui nan. Tumami na serio, pasobra hasta loke mi a vota biaha no ta un garantia cu mi lo vota mescos". E grupo indeciso ta ‘controla’ mas o menos 2 asiento, pues nan por haci un diferencia den e resultadonan di 25 di juni, 2021. E encuesta ta cera diahuebs merdia proximo. Pa esnan cu no a participa ainda y cu kier haci esaki, por click AKI.