Wever-Croes ta sigura di no a ricibi peticion di Sr Gilmar Pisas pa reuni na Aruba

ORANJESTAD – Lider di partido MFK di Corsou Gilmar ‘Pik’ Pisas no a bin Aruba pa reuni cu gobierno di Aruba. Asina minister president Evelyn Wever Croes a clarifica diamars atardi den un comunicado. Esaki despues cu a bira conoci den fin di siman cu sr Pisas tabata na Aruba y cu lo tabatin intencion di bishita e prome mandatario. Pero ora cu fin di siman a pasa, e portal AweMainta a raporta cu prome minister no kier a topa cu e actual parlamentario di Corsou y future prome minister di Corsou. Pero segun e comunicado, ningun momento e la nenga di topa cu sr Pisas. Simplemente cu e no a haya peticion di sr Pisas pa reuni. E mandatario a bisa si cu el a tuma nota cu sr Pisas tabata na Aruba den fin di siman. 

ENTREVISTA

Tabata den un entrevista cu 24ora diasabra atardi, sr Pisas a informa cu el a bin Aruba riba peticion di su bon amigo Melvin Tromp(AVP) y cu dialuna su intencion tabata pa bay papia cu gobierno di Aruba tambe y cu e la bin cu tur documento pa papia cu e mandatario di Aruba. Esaki den cuadro cu sr Pisas ta poni pa bira e proximo prome minister di Corsou despues di e eleccion cu su partido MFK a gana na maart ultimo. Aparentemente esaki no a logra y e dos politiconan no a tuma nunca. E motibo pa e portal aki no ta conoci, mirando cu Pisas a bisa si publicamente cu su intencion tabata pa reuni cu e mandatario di Aruba.