Cambionan den Codigo Civil ta drenta na vigor entrante 1 di september proximo

ORANJESTAD - Conseho di Ministro a dicidi cu e cambionan den e Codigo Civil lo drenta na vigor entrante dia 1 di september venidero. Ta trata di cambionan den buki #1, cu ta atende cu ‘personen- en familierecht’, buki #3 cu ta regarda ‘vermogensrecht’, buki #4 den cual ta atende tur asunto di herencia (‘erfrecht’), buki #5 referente ‘zakelijke rechten’, buki #6 referente ‘verbintenissenrecht’, buki #7 cu ta regarda ‘bijzondere overeenkomsten’ y ademas cambionan pa medio di e Ley di Introduccion (‘Aanpassingsverordening aanvulling BWA’) cu ta regarda stipulacionnan di transicion (‘overgangsbepalingen’), diferente leynan cu ta acopla na e Codigo Civil y notanan di cambio.   

ESPACIO

E fecha di 1 di september 2021 lo duna espacio pa diferente departamento di Gobierno y sector priva por prepara y, por ehempel, unda cu mester haya cursonan, pa por prepara pa tur e cambionan. Di parti di Gobierno lo inicia un campaña di informacion pa concientisa riba e diferente cambionan cu lo tuma luga. Ta despues di hopi aña cu ta actualisa nos leynan civil y como tal comunidad mester ta bon informa riba nan derechonan pero tambe nan obligacionnan.