Politico nobo docter ta acusa y minister ta desmenti metemento den Telearuba

ORANJESTAD – Minister Dangui Oduber ta desmenti cu e lo a mete cu programacion di Tele Aruba y asina stroba dr Selene Kock, e candidato nobo di AVP di pasa su programanan. “E presenta e prueba of carta of mail of cu kende mi lo a papia” e mandatario a bisa noticiacla diabierna mainta. E ta refuta asina e  declaracionan haci pa dr Kock diahuebs anochi na un encuentro publico na Pos Chikito. Segun sra Kock, e mandatario ta culpable. “Dangui ta yama Tele Aruba pa boycotea mi programa informativo over di Covid, asma y Osas” e dr Kock a bisa durante su discurso cortico. E politico nobo a alega cu segun e, e mandatario di salud so lo por pasa programa politico, mientras cu segun sra Kock, su programanan ta educativo so. E mandatario a refuta e acusacionan aki contra e dr y a considera e declaracionan como ‘deremate’. “Of sra Kock por puntra Tele Aruba tambe si nos lo a tuma contacto cu nan. Nos ta biba keto bai den un pais liber y democratico. Porta den su partido AVP tin censura of miedo pa informacion yega serca pueblo pero nos no tin ningun problema cu esaki” e mandatario a sigura e portal aki.

VIDEO VIRAL

Mester bisa tambe cu di tur e candidatonan cu a presenta diahuebs anochi pa e partido berde, esun cu mas a hala atencion, ta di e dr Selene Kock, pa su forma con el a expresa su mes. Tabata mustra cu e dr no tabata domina su voz y porta inconciente, tabata lansa gritonan, cu a haya conotacion chistoso despues pa e contenido. E momento cu e dr a usa e declaracion awor Famoso di ex prome dama di Merca, Michelle Obama cu ‘when they go low, we go high’, dr Kock a usa esaki tambe pero e forma cu el a usa esaki, a resulta despues den un forma exita cu a wordo usa despues como meme politico. E presentacion di e dr a bay viral despues y a bira e video mas popular di dia.