Hooyboer: SKOA dispuesto pa re-evalua aumento di schoolgeld

ORANJESTAD – Stichting Katoliek Onderwijs Aruba (SKOA) ta dispuesto pa re-evalua e aumento drastico di schoolgeld, y sinta cu su directiva pa un cambio. Esaki ta e resultado di un reunion awe mainta entre minister di enseñansa Michelle Hooyboer y e directora di SKOA, Jossette Daal. “Nos a splica cu nos ta compronde y reconoce e situacion di SKOA pa cual nan kier aumenta e tarifa” Hooyboer a comenta na NoticiaCla.com despues cu e la tene e reunion awe mainta. “Loke nos a bisa SKOA ta cu nos no a bay di acuerdo, ta e suma y e forma con e aumento di schoolgeld a wordo presenta”, e mandatario a sigui bisa. Ta trata di e aumento di 233% den un solo tiro. Tur esaki ta sosode mientras cu awe tardi tin un manifestacion planea di mayor disgusta, dilanti edificio di SKOA. 

Tabata ayera cu e mandatario a ricibi un contesta di SKOA riba su carta di november di aña pasa. Den e contesta nan a reitera nan posicion, pero mes momento a pidi mas informacion di parti di gobierno. A admiti cu tin un retraso den presentacion di jaarrekening di algun aña, cu ta dificulta e contesta si tin un deficit of no y por presenta esaki na gobierno. 

“Nos a sali for di otro cu nos lo continua e serie di reunionnan aki den e simannan cu ta bin. Lo tin un serie di reunionnan necesario pa por trece tur e informacion riba mesa. E acuerdo cu nos a haya di nan ta cu unabes cu tur cos ta riba mesa, nan lo bay bek serca nan directiva y reconsidera y discuti y bolbe cu un decision final” Hooyboer a sigui bisa. No a bisa formalmente cu lo para e aumento di schoolgeld awor, pero e compromiso tey di nan banda, pa por lo menos re-evalua nan decision. Pa loke ta e manifestacion di awe tardi, SKOA a informa e mandatario cu nan lo ta presente pa ricibi e manifiesto entrega. “Pero no tabatin mucho discusion riba e asunto aki.

Tabata algun dia pasa den un otro entrevista cu e mandatario di enseñansa, cu e la bisa cu dentro di un siman, e mester a haya contesta di Stichting Katholiek Onderwijs Aruba (SKOA), riba e asunto di aumento drastico di ‘school geld’. Ta trata di un carta manda for di aña pasa november cu e peticion, pero cu ainda no tabatin contesta. E aumento (di schoolgeld) ta uno cu ta di 75 florin pa 250 florin y cu tin cu wordo paga awor. E mandatario a sigura NoticiaCla.com e merdia ey cu e no a sinta keto y cu bou di ningun circumstancia, muchanan lo (tin cu) keda perhudica cu e situacion di aumento. E ta admiti cu e ‘aanpak’ di SKOA no ta esun mas adecua. Mes momento e ta refuta e acusacion di oposicion cu gobierno no ta haciendo nada. De hecho, SKOA no ta maneha scolnan publico, y como tal nan por haci loke cu nan kier sin cu gobierno tin control riba esey. Esey no kier men si, cu SKOA lo por actua sin mas, Hooyboer a sigui splica. Riba e pregunta pakico e tabata keto riba e topico aki, e la sigura cu e la haci varios declaracion riba e tema aki caba. Mientrastanto SKOA a manda un carta di recordatorio recientemente (lesa e carta aki) pa corda mayornan riba e pagonan necesario.  Foto di archivo di un reunion anterior entre e mandatario  y directiva di SKOA, Jossette Daal y Gioanni Kock.