Na Corsou: Varios grupo interesa pa cumpra Kura Hulanda Lodge

WILLEMSTAD  – For di yüli di aña pasá tabatin 6 interesado pa kumpra e lokalidatnan di Kurá Hulanda Lodge. Den e último dianan aki tin rumornan fuerte ta sirkulá ku lo a bende e hotèlnan ku un grupo albanes. Pero for di fuentenan digno di krédito, a kompensá ku en bèrdat e grupo albanes ta un di e vários interesadonan pa kumpra e hotèlnan, pero no a yega dje leu ei ainda. Benta di un hotèl no ta bai dje lihé ei, pero e aspekto positivo ta ku tin interesadonan serio pa kompra di e hotèlnan.

Te ku aña pasá lo tabatin un grupo Colombiano ku ta manehá vários kadena hotelero den region ku tabata interesá den Kura Hulanda, pero ora ku bankarota a bati na porta, e grupo aki a hala atras, pa motibu ku e daño hasí tabata muchu grandi. E tres instansianan finansiero ku ta tras di e findishi ta Korpodeko, MCB i Girobank i abogado Aaron de Winter lo ta curator enkargá ku e benta di hotèl. Manera ta konosí ku for di aña 2013 Kurá Hulanda tabata pasando den problema serio ku vários aspekto ku nan no por a kumpli kuné mas. Un di nan tabata pago di koriente, ku na un okashon Aqualectra a bai dje leu ei di menasá di kita koriente. Despues ku Korpodeko a pone plaka, a logra solushoná e problema pa un periodo kòrtiku. Tabata 25 òktober di aña 2013 ku a pidi pa deklará e hotèl bankarota. Esei a sosodé dor di hues den promé instansia.

Segun fuente, e interesadonan tei i tin vários kombersashon tumando lugá i esaki ta motibu ku enbèrdat por a tuma nota den e último simannan vários grupo ku tabata kana den e hotèlnan i realisá inspekshon di e lokalidatnan i den esaki e grupo albanes tambe a forma parti.Texto ta den Papiamento di Corsou, den forma fonetico.