Na Corsou: Demanda di 14 y 18 aña di prison pa pareha atracado den Vitz

WILLEMSTAD - Fiskal Hato Willems ayera a hasi demanda di 14 aña pa e muhé S. Walle (22) i C. Cepeda (27) ámbos akusá di a kometé 31 atrako i intento di asesinato.

Nan kareda a yega na final dia 29 sèptèmber 2020, ora un agente di LBD ku tabata den serkania di e restorant na Caracasbaaiweg, a tuma nota di un atrako ku tabata tumando lugá na e establesimentu. El a mira kon un hòmber ku pèchi di kamuflahe, a kore sali pafó ku e kaha di plaka den su man i tabata zuai machete riba un persona di e restorant ku tabata purba evitá ku e hòmber ta bai ku e kaha. Durante di e suseso e hòmber a kap e víktima ku a resultá e kòki di e restorant ku machete na su pòls, man, dede i tambe vários parti di su kurpa.

E polis ku a presensiá esaki a lòs un tiru dirigí riba e hòmber ku a alkans’é na su pia i asina a logra detené.

Ayera vários víktima tabata sintá den sala di korte. Entre nan e kòki ku e keda heridá durante e último atrako di e pareha. E víktima a bisa ku for di e dia ei su man no ta funshoná optimal mas. Su ‘pink’ ta praktikamente morto i no por us’é. Ainda e ta bai terapia pa por move su man. E kòki a desmentí di bai ku kuchú riba Cepeda manera el a deklará. El a bisa ku e no ta kere nada di e despensa ku e pareha a pidi nan.\ Lokual ku e tin ta duele di e yu òf yunan di e pareha ku tin ku bai krese awor sin nan mayornan.

Pa loke ta trata un otro víktima doño di un establesimentu ku tambe a bira víktima di e pareha i tabata sintá den sala, a bisa ku e dia ei e hòmber a presentá riba dje i sin papia nada a bai ku e kaha di plaka. Debí ku e ta sufri di kebrante di salú el a spanta asina tantu te ambulans mester a bai tira un bista riba dje.