‘Crecemento di casonan positivo di corona na St. Maarten ta alarmante’

PHILIPSBURG - Minister di Salubridat Públiko, Desaroyo Sosial i Labor di St. Maarten Omar Ottley djárason último a duna di konosé ku kresementu di kasonan positivo di COVID-19 na St. Maarten ta alarmante. Den e último tres dianan e pais a registrá 44 kaso nobo di Corona. E kantidat di kasonan aktivo a subi te 63. Den e último simannan St. Maarten a konosé basta tiki kasonan nobo. Ottley a bisa ku gobièrnu tin ku tuma desishon duru pa protehá poblashon. Te ainda minister no a tuma e desishon. E ta den deliberashon ku departamento di Salubridat Públiko I Collective Prevention Service (CPS). Na St. Maarten djárason 19 di mei 19 persona a tèst positivo pa COVID-19. Riba mesun dia 5 persona a rekuperá. Ku esaki e pais ta konosé 63 kaso aktivo di COVID-19.

E kantidat di kasonan konfirmá awor ta 2326. Den total 27 persona a fayesé dor di COVID-19 riba e isla for di Mart aña pasá. Kuater pashènt ku COVID-19 ta keda den St. Maarten Medical Center na e momentunan aki. Tin 59 persona ku tin ku keda den isolashon na kas. Banda di esei tin 88 persona den karentena.

E kantidat di hende ku a rekuperá for di e promé kaso ta 2236. Tim di Salubridat di Aeropuerto di Ministerio di Salubridat Públiko, Desaroyo Sosial i Labor den kolaborashon ku ‘Health Care Laboratory Sint Maarten’ a tèst 2890 biahero ku a yega na Princess Juliana International Airport, (PJIA) for di luna di mart di aña pasá. CPS a tèst 28.642 hende den komunidat. Texto den papiamento fonetico di Corsou.