Na Corsou: MFK/PNP ta sigui kere den IMF enbes di COHO

WILLEMSTAD - Lokual gabinete Pisas ainda tin diferensia di opinion riba dje ta e COHO. E COHO lo ta e entidat ku ta enkargá ku supervishon pa ku e reformanan proponé den e landspakket. Gabinete Pisas ke mantené un bon laso ku otro paisnan den reino. Na momento ku tin un COHO, bou di guia di “Ministerie van Binnenlandse zaken” esaki por trese frikshon entre Kòrsou i Hulanda, kual no ta deseabel. Pa e motibu aki, partidonan ke skohe pa un terser partido independiente ku lo ta enkargá ku e supervishon di nos kumplimentu ku e reformanan den e landspakket. Esei di akuerdo ku drs. Javier Silvania durante un enkuentro ku prensa ayera tardi.

Segun Silvania, manera nan a bini ta indiká, IMF lo ta e partido korekto i adekuá pa hasi e supervishon aki, komo un terser partido independiente. Den e karta ku sr. Knops a manda pa sr. Pisas i sra. Larmonie, sr. Knops ta indiká ku e ta apoyá pa IMF ta parti di e trayekto aki. Pa e motibu aki nan ta spera di por sinta na mesa i yega na un solushon riba e punto aki kaminda ta laga e COHO lòs i skohe pa un supervishon di IMF.

E tarea di IMF den e kaso aki lo ta pa traha e programa finansiero konforme Nationaal Herstelplan i hasi supervishon pa kontrolá ku gobièrnu di Kòrsou ta kumpli ku su obligashonnan manera indiká den e landspakket.

IMF ta un organisashon mundialmente konosí ku a yuda diferente pais den pasado pa sali for di krísis i difikultatnan finansiero. Tambe IMF tin konosementu amplio di Kòrsou, komo ku lo no ta promé bia ku Kòrsou a traha ku IMF. COHO di otro banda ta un entidat ku ainda no ta eksistí. Ta awor lo mester lanta e entidat aki i buska personanan ku lo ta enkargá ku e diferente tareanan di supervishon. E rísiko di esaki ta ku e COHO lo ta ménos eksperensiá i lo tin ménos konosementu di Kòrsou i a konsekuensia e supervishon lo no ta mesun efektivo. Texto den papiamento fonetico di Corsou.