Na Corsou: A entrega keho pa destruccion di propiedad contra comerciante Hulandes

WILLEMSTAD - Ayera mainta representantenan di Fundashon ViBa (di Banda Bou) huntu ku algun habitante di Lagun a tene un konferensia di prensa kaminda a duna informashon amplio relashoná ku henter e situashon ku tin na Lagun. Ta trata aki di un disputa entre doñonan di Lagun Blou Resort i manehadónan di dos wikènthùis na Lagun.

Segun representantenan di Fundashon ViBa, tur kos a kuminsá 6 aña pasa na momentu ku doñonan di e resort a lanta un muraya di mas ku 2 meter haltu di kual esaki a subi tereno ku ta pertenesé na dos wikènthùisnan. Konsekuentemente a tapa bista pa laman di e wikènthùisnan aki kompletu.

Partidonan a purba yega na akuerdo ku otro, i a sinta na mesa na vários okashon, pero nunka nada a bin afó.

Algun dia atras kana di abitantenan a yena i nan a basha parti di e muraya ku a keda traha ilegalmente abou. Esaki a kondusí asta na detenshon di algun abitante pa e akto aki. Outoridatnan a ordená doño di e resort pa limpia sobra di e muraya ku e abitantenan a basha abou kual no a tuma lugá ainda.

Aparte di esaki tin dos veredikto wes di 2009 i 2011, kaminda e abitantenan, doño dje wikènthùis nan ta haña rason den korte. Pero tòg doño di e resort a bolbe sera e tereno i te asta a sera parti di e wikènthùis aden atrobe. Esaki a keda prueba ku e pènchinan di Kadaster ku a keda sera den e tereno dje resort. Despues di e konferensia di prensa ayera, Fundashon ViBa a bai warda di polis na Barber, kaminda a entrega un keho ofisial pa destrukshon di propiedat riba e tereno. Texto den papiamento fonetico di Corsou.