Na Corsou: Mas miembro “Coalicion” den comishonnan pa evita cu no tin quorum

WILLEMSTAD - Gilmar Pisas djaluna último den reunion di parlamento a pidi pa amplia e kantidat di miembronan den e diferente komishonnan di parlamento. Pasobra e no ke pa e situashon di falta di kuórem sosodé manera a pasa e aña aki. E proposishon aki a haña sosten den parlamento.

T’asina ku Pisas a indiká ku nunka tabatin un situashon, kaminda tin dos frakshon ku tin mayoria i na e otro banda kuater frakshon den parlamento.

Ku eksepshon di e komishonnan di asuntunan di Reino i Doméstiko, ta bai haña ku frakshon di PNP i MFK ku tin mayoria den Staten, sin koperashon di otro frakshonnan no por yega na kuórem nunka. Pisas a proponé ku e dos frakshonnan lo pone mayoria hende den e komishon ku ta resortá e kartera di e ministerio ku ta kai bou di PNP i MFK. P’esei e ke amplia e komishonnan na komishon na 9 miembro. Komo ehèmpel sr. Pisas a bisa ku si frakshon di PAR no presentá, no por tin kuórem, si mira loke a sosodé den pasado resien.

Parlamentario sra. Ana Maria Pauletta a reakshoná riba e partikularidat aki puntrando ta ku ki motibu ta amplia. Sr. Pisas a papia di miedu ku partidonan di oposishon no ta presentá forma kuórem i ke tin sufisiente miembro di PNP i MFK pa e reunionnan sigui tòg. Esaki lo tabata e eksperensia ku MFK tabatin den pasado resien ku nan no tabata presentá. Si ta papia di kambio di parlamento ta algu ku ta bai kambia. E ke sa pa kiko mester tin sobrepresentashon di e dos partidonan den e komishonnan. E ke sa kuantu miembro tin den kada komishon. Papiando di ban traha huntu i mas igual den parlamento e no ta representativo dje intenshon.

Meta di e komishon “Werkwijze” ta di prepará reunionnan di komishon, pidi dokumento, deliberá ku minister, tene oudiensia i hasi bishita di trabou. Komishon fiho no ta tuma desishon, ta den komishon sentral ta hasi esei. Tur miembro di parlamento por partisipá na e komishonnan fiho sin ku nan mester ta miembro di e komishon. Tin un kantidat di argumento innesesario pa tin sobrepresentashon di MFK i PNP den e komishonnan. Awor aki koalishon tin mas asiento i por vota pro e proposishon. Pero e no ta karga e espíritu ku sra. presidente a start reunion di parlamento kuné kual ta igualdat, sra. Pauletta a terminá argumentando.

Parlamentario sra. Mc. William tambe a reakshoná riba e proposishon di sr. Pisas.

Mr. William a proponé pa laga e parlamento kuminsá ku e komishonnan i laga kosnan kana promé ku kuminsá wak nan spiritunan di den pasado resien. Duna espasio wak kon nan ta kana. Si akaso e spiritunan ta kana ainda, ta bai atendé kuné. Esaki ta demokrasia. E tin miedu ku nos ta papia di Chavismo, Madurismo, i pa no haña Pikismo. Mc William a proponé 6 hende den e komishonnan.

Sra. Larmonie-Cecilia a bisa ku niun kaminda ta para kuantu miembro mester tin den komishonnan. Ta solamente den Komishon Doméstiko i e Komishon di Asuntunan di Reino esaki ta para.

Finalmente parlamento a sostené e proposishon di sr. Pisas pa amplia e komishonnan ku mas miembro.