Na Corsou, Toque de Queda a bai 11 or y baimento di laman ta casi normal atrobe

WILLEMSTAD – Toque de Queda ta kambia for di mañan i ta kuminsá for di 11 or djanochi te ku 4:30 or di mainta, miéntras di baimentu di playa ta bira algu kasi normal atrobe. Esei ta loke por a konstatá for di deklarashon di nos Promé Minister sr. Eugene Rhuggenaath ayera mèrdia durante un enkuentro ku prensa. Segun e mandatario, gobièrnu a tuma e desishon di suavisá algun sektor mas esei pa motibu ku e situashon ta basta normal i no tin muchu preshon riba hospital. Pero den e mesun rosea el a rekordá ku e suavisashonnan aki ta ser hasí, pero di un manera responsabel pa no tin mester di tuma medida atrobe. Pa su parti lo tin di eliminá e medidanan aktual, esei ta e meta pero di un forma responsabel.

Suavisashon:

Entrante mañan 19 di mei toke de keda lo bira di 11 or djanochi pa 04:30 or di mainta, ku eksepshon di funshonnan vital den komunidat.

Tambe entrante e mesun fecha tur kompania i organisashon por ofresé servisio di akuerdo ku nan pèrmit ekonómiko, ku eksepshon di bar, snèk i beachclubs ku no tin un pèrmit di restorant. Tur bar, snèk i beachclub ku no tin e pèrmit menshoná por sigui ofresé servisio di akuerdo ku nan pèrmit ekonómiko te ku 8 or djanochi. Ku solamente klientenan sintá lo por keda na e establesimentu i ku un máksimo di kuater persona na kada mesa òf si ta hendenan ku ta biba den e mesun kas.

Un otro parti dje sektor, kual ta regardá restorantnan, lo por kuminsá sirbi klientenan parti paden tambe. Pero mester mantené 2 mete di distansia entre kada mesa, i ta permití un máksimo di kuater persona na un mesa. Ora ku sinta paden, e klientenan lo no por keda sinta mas largu ku dos ora konsekutivo. Nan lo por sirbi te ku un máksimo di 50 porshento di nan kapasidat total di kliente.

Mas aleu entrante e mesun fecha salanan di sine lo por bolbe hasi pa públiko di akuerdo ku nan pèrmit i te ku 10 or djanochi. Lo tin di apliká si e protokòlnan akordá ku gobièrnu.

Ta bini aserka ku kasinonan tambe lo por habri pa públiko segun nan pèrmit ekonómiko te ku 10 or djanochi. Kasinonan tambe lo tin di apliká e palabrashon i protokòlnan ku a keda akordá ku e sektor.

Trùknan di pan lo por ofresé servisio di 6 or di atardi pa 10 or djanochi. Nan lo por hasi esaki pa medio di entrega na kas òf ‘curbside’.

Pa loke ta playanan, tur hende lo por bishitá laman atrobe di 04:30 or di mainta pa 08:00 or djanochi. Lo por bishitá laman den gruponan di kuater persona maksimal òf personanan ku ta biba den e mesun kas. Lo no permití aglomerashon ni hasimentu di BBQ na playanan.