Aeropuerto di Aruba “Highly Commended” pa excelencia den Airport Marketing

ORANJESTAD –Aeropuerto di Aruba a ricibi premio “Highly Commended” pa excelencia den Airport Marketing den e categoria di menos cu 4 miyon pasahero. E award a wordo orguyosamente ricibi door di aeropuerto su Head Airline Marketing, Jo-Anne Arends Barbara Brown, Business Unit Manager Terminal. Mas cu 650 profesional den e mundo di aviacion tabata hunto na Denver, Colorado pa presencia e presentacion di e awardnan y pa participa na e di 8 Routes Americas – e evento pa desaroyo di rutanan mas grandi den America.

E evento di otorgamento di award anual di Routes ta wordo considera como e award mas valioso den e industria door cu ta e comunidad di airline network planning mes ta vota. Nan ta brinda e oportunidad na e comunidad di aerolineanan pa bisa cua aeropuerto ta duna mihor servicio di mercadeo en general na nan, sea e ta den nan relacion particular, resultadonan efectivo, provision di data y informacion of uso di tecnicanan inovativo pa crea of mantene rutanan nobo of existente. Aeropuerto di Aruba a wordo nomina pa e Airport Marketing Award hunto cu Regina Airport Authority (Saskatchewan, Canada), Montego Bay International Airport, Savannah/Hilton Head (Georgia) y State College (Pennsylvania).