Premier ta frustra cu comportacion di comunidad pa cu Covid19

ORANJESTAD – Prome minister di Aruba Evelyn Wever Croes ta frustra riba e forma con cierto hende ta actuando ultimo tempo relaciona cu Covid19 y sigur  awor durante e campaña politico actual. Esaki ta indica cu e mensahe ainda no ta yegando tur caminda pa cu e situacion di pandemia y su consecuencia si hende no tene medida di precaucion pa evita contagio. Pero mes momento a bisa cu e situacion actual di e pandemia no ta hustifica pa tumas mas medida, aunke su preferencia tabata pa mantene esaki. Asina el a reaccion dialuna mainta riba e tema di comportacion di politiconan den pleno campaña, incluyendo su propio partido. 

FRUSTRACION

Segun e mandatario, e ta frustrante ora cu wak cu pueblo ta sigui haci intento pa brasa sunchi y mas durante sigur e campañanan politico actual. E ta compronde cu hendenan ta bin riba e politiconan incluyendo su mes, unda cu e politiconan ta acerca hende y e hendenan ta bin y brasa y sunchi. Segun e premier, ta e ciudadanonan ta haci e intento pa brasa y sunchi e politico. Ora cu a confronta e premier pakico autoridad no ta actua, e mandatario a bisa cu esey no ta su tereno, sino esun di minister di husticia pa atende polis pakico ta atende cierto hende si y cierto no. 

MEDIDA

A mustra cu cierto medida manera samenscholing a keda cancela recientemente, no pasobra kier, sino pasobra e medida no ta hustifica legalmente, debi cu e situacion ta mustra hopi bon. Y ora cu e situacion ta bon, no por impone cierto medidanan di privacidad limita pasobra legalmente no tin pia pa para ariba. E mandatario a indica cu si ta pe, medidanan lo keda ainda pero legalmente esaki no ta possible. 

COMPORTACION POLITICO

Den e conferencia, a hala atencion di e mandatario, indicando cu specificamente e campaña di minister di salud ta mustra cu lo no ta teniendo cuenta y violando regla di Covid19, door di no tin tapaboca y distancia social manera ta wordo rekeri. Riba esaki e mandatario a mustra cu esaki ta cay bou di minister di husticia unda cu e ta esun cu tin cu check cu polis pakico cierto accionan no ta wordo tuma, tambe si ta trata di politiconan. Y den e caso aki, mester mustra cu ta trata di varios politico di su propio partido, y no solamente e minister di salud.