Larmonie-Cecilia: Carta di Knops ta nada mas cu un chantahe

WILLEMSTAD - Partido PNP a tuma nota di e karta di Sekretario di Estado sr. Raymond Knops, i lo duna kontesta riba esaki di e forma apropiá. Pero sr. Knops mester komprondé ku ne alturanan aki un grupo ku no tin e outoridat (ainda) no por bai sinta negoshá i komprometé pais riba algu di tal magnitut. Sinseramente tin di konsiderá e karta di Knops komo un chantahe. Asina e lider polítiko di PNP, sra. Ruthmilda Larmonie-Cecilia, a duna di konosé   den un reakshon riba e karta di sr. Knops. T’asina ku e siman aki sr. Knops a dirigí un karta na lidernan Larmonie-Cecilia i tambe Gilmar “Pik” Pisas informando esakinan ku dado kaso e próksimo gobièrnu no bai di akuerdo ku palabrashonnan hasí riba COHO, ku Hulanda lo sera kranchi pa loke ta e sosten finansiero pa Kòrsou.

Segun sra. Larmonie-Cecilia, el a risibí e karta ayera mèrdia i a tuma nota di esaki su kontenido. Pero lo duna kontesta riba esaki di e forma apropiá i a base di palabrashonnan ku tabatin ku otro kaba. Den su karta sr. Knops ta haña ku e próksimo gobièrnu lo ta nenga di sigui negoshá e COHO. Pero e mester komprondé ku e representantenan lokal no por sinta negoshá nada pasobra nan no tin e outoridat pa hasié. No ta negoshá nada miéntras ku tin un trayekto ta kanando.  Loke a splika Knops ta kiko ta nan vishon. Pero ku un reakshon manera esaki no por kategoris’é di nada otro sino un chantahe. Ta manera ku Knops ke fòrsa pa bai kumpli ku su agènda. “Ami tin di kumpli ku agènda di pais. Ami tin di sirbi pueblo di Kòrsou”, asina e lider polítiko a opservá.

Kiko ta bai sinta na mesa i negoshá i komprometé pais sin ku bo tin outoridat. Mañan ku Dios ke pueblo lo tilda nan di a hasi kos sin outoridat. No ta asina e kosnan ta funshoná. E kos aki ta masha simpel, no ta bai sinta na mesa sin outoridat. E gobièrnu ku ta sintá te ainda ta demishonario i tur palabrashon e tin di kumpli ku nan te na momentu ku un otro drenta.

Den e tipo di asuntunan aki tin formalidatnan ku tin di apliká. Den e kaso aki tin un palabrashon entre paisnan, i ningun siudadano di pais no por komprometé pais si e no ta outorisá pa hasi esei, e mag di krusa e liña ei.