Gobierno di Corsou ta sigui suavisa medidanan contra Covid19

WILLEMSTAD - Awe gobièrnu lo anunsiá mas suavisashon di medidanan. Gobièrnu di Kòrsou ta sigui evaluá pa suavisá e medidanan vigente na un manera responsabel. Algun di e medidanan ku ta den tapara pa evaluá pa suavisá ta entre otro e orario di toke de keda, bishita na laman, habrimentu di kasinonan, sine, atrakshonnan, deporte, èts. Una bes tuma na konsiderashon tur e argumentonan, lo anunsiá e suavisashon awe djaluna próksimo 17 di mei. Gobièrnu ta informá ku nan mester sigui mantené bon kontakto ku stakeholders pa asina sigui informá komunidat korekto. P’esei ta importante pa semper tantu sektor públiko komo privá keda den kontakto regularmente ku otro pa evitá ku ta yega asina leu ku ta saka publikashonnan ku ta basá riba informashon ku no ta keda bon interpretá. Gobièrnu ta lamentá ku esaki a sosodé último aki ya ku na vários okashon a hasi intento pa keda informá otro korektamente. Awor ku Hulanda a pone Kòrsou bèk na kódigo gel, mas ku nunka Gobièrnu ta move pa evaluá mas di e medidanan na un manera responsabel sin ku ta perhudiká sektornan negativamente. P’esei ku un poko mas pasenshi, ta logra na un manera responsabel suavisá tur e medidanan pa asina krea, re-inventá i biba mei mei di COVID-19 sin mester yega asina leu ku tin ku bolbe tuma medidanan den futuro ku ta afektá tur hende su bida drástikamente.