Lo tin 12 partido participando den e eleccion parlamentario!

ORANJESTAD – Un total di 12 partido politico lo participa den e  eleccion Parlamentario e aña aki. Esaki a keda confirma diabierna merdia ora cu partido politico CURPA tambe a logra acumula su firmanan necesario (587) pa por sigura nan participacion. Mientras cu tur 8 cu tabatin mester di firma, a logra esaki, esey no ta un siguransa cu nan lo haya asiento si. Tin partidonan cu a haya suficiente firma, pero durante eleccion a ricibi menos voto cu nan a ricibi firma. Por bisa p.e. cu na 2017, un total di 7 partido mester a haya firma di cual 6 a logra, pero na final ta 2 solamente a logra asiento pa por a participa. 

LOGISTICA

E cantidad grandi di partido tambe ta haci e parti logistico un reto. Cuminsando cu e stembiljet unda cu mester busca un tamaño cu tur por ‘fit’ riba e papel. Tambe tin e parti di debatenan politico unda cu tin por lo menos dos debate unda cu tur partido politico lo mester ta riba scenario hunto. Esey ta bira sigur un reto structural pa por ‘fit’ esaki, aunke e otro reto ta bira e forma con ta logra percura pa tur partido haya nan respectivo tempo y den un tempo cu no ta bira excesivamente largo. Na Merca esaki a sosode ora cu tabatin un cantidad grandi di candidato presidencial, pero unda cu a dicidi di parti di debate den dos. No ta conoci si esaki ta bay ta e caso tambe cu e debatenan planea. 

PROGRAMAFuera di esey, tin tambe e parti di publicidad reglamentario radial y televise unda cu e radio y tv nan local mester (pa ley), reparti e orario di propaganda den un forma ekivalente pa no discrimina den esaki. Un di e metanan di e ley aki, ta pa evita cu e partido cu mas forza financiero, por cumpra tur ora y laga e partidonan cu menos recurso, for di publicidad. E asunto aki por bira un reto sigur pa e radio emisoranan y tv, pa por cumpli cu e regla aki. Potret ta di archivo di noticiacla di e debate televisa di kvk na 2017.