Variante di Covid-19 di Brasil (p1) y di India a yega Corsou

WILLEMSTAD.- Instituto di Reino pa Salubridat Públiko i Medio Ambiente (RIVM) a deskubrí variante di Brasil, Colombia i India na Kòrsou. Banda di esei e variante britániko ta keda hopi aktivo riba e isla.

Ta trata di kasonan entre 13 aprel i 26 di aprel. Kòrsou a manda 50 muestra for di e periodo pa Hulanda. RIVM a logra di bin ku un konklushon tokante 40 di e muestranan. Un di nan tabata e variante P1 di Brasil, un tabata e variante Indio i un tabata e variante di Colombia. Gran mayoria tabata e variante britániko. Asina epidemiólogo dr. Izzy Gerstenbluth a splika ayera. Segun Gerstenbluth despues di 26 aprel tabatin otro kontagio riba nos isla. Komo konsekuensia chèns ta grandi ku e variantenan di Brasil i India a infektá mas persona kaba. Pero no tin konfirmashon di esaki. Den e kasonan ku RIVM a konfirmá ku ta un variante di India i un variante di Brasil ta trata di hendenan ku no a bishitá e paisnan mes. E persona ku tabatin e variante brasilero a bishitá Hulanda, e persona ku e variante di India a bishitá Hulanda i Fransia. Segun Gerstenbluth chèns ta grandi ku ámbos persona a keda infektá na Hulanda.

Relashoná ku e variante di Colombia Gerstenbluth a bisa ku e no ta ‘a variant of concern’, ku ta nifiká e no ta un variante di preokupashon. Meskos ku por ehèmpel e variante di México.

E variante P1 di Brasil si ta konta komo un variante preokupashon Segun organisashon di salubridat mundial WHO e variante di India ta un variante di preokupashon, pa segun Oropa te ainda no.

Tur di esaki ta mustra, segun Gerstenbluth, ku seramentu di frontera ku Brasil òf India no evitá e variante pa drenta Kòrsou. ‘Nos ta habri pa Hulanda. E diferente variante a plama rònt mundu kaba. No ta manera e variante di India ta na India so. E ta rònt mundu kaba.’ Gerstenbluth tambe a enfatisá ku ta keda importante pa laga solamente hende drenta ku tin un tèst di PCR negativo i tambe e ‘antigeen-test’ despues di tres dia ta keda importante.