Na Corsou: Mas detencion den caso di fraude na e instituto Wit Gele Kruis

WILLEMSTAD.- Investigashon den kaso “Zonnebloem” a sigui kana i den dianan tras di lomba, outoridatnan hudisial a hasi dos (2) detenshon di sospechoso. Ambos sospechoso despues di interogashon por a bai kas, miéntras investigashon ta kontinuá den e kaso aki.

Djamars 11 di mei 2021 e tim di Kuerpo Polisial ku ta hasi investigashon riba krímennan finansiero i labamentu di plaka a hasi un detenshon mas. Ta trata di e hòmber sospechoso L.S.O. di 52 aña di edat nasé na Kòrsou.

Manera ta konosí e investigashon “Zonnebloem” ta un investigashon en konekshon ku froude i labamentu di plaka ku supsidionan di gobièrnu na e instituto Witgele Kruis.

Ta trata di un kaso den kual un trahadó di e instansia na aña 2015, lo a hasi denunsia ku e pareha sospechoso lo a kometé froude ku “Jaarrekening” di aña 2014, ku ta un suma di mas di 700 mil florin. Despues di 2 aña di e denunsia ku ta na aña 2017, OM a kuminsá ku un investigashon den e kaso aki.

Ta sospechá L.S.O. di a risibí pago pa trabounan fiktisio ku mester a tuma lugá na edifisionan di Witgele Kruis.

Despues di a presentá e sospechoso aki dilanti di un fiskal ouksiliar, e por a bai kas na final di e interogashon.

Dia 28 di aprel 2021 tambe e tim a hasi detenshon di e hòmber sospechoso R.J.J. di 34 aña di edat nase na Kòrsou, den kuadro di e mesun investigashon aki.

Despues di interogashon, e tambe a bai kas pendiente di e investigashon ku lo kontinuá. Ya for di aña pasá tabatin algun detenshon ku a keda realisá, entre kua e direktora di e instituto, su esposo i un trahadó atministrativo.

E detenshonnan a tuma lugá riba djaluna 14 di sèptèmber 2020. A detené kuater sospechoso riba dicho dia i despues a pone nan den libertat pendiente investigashon i pa nan kaso yega korte.

Ayera Kuerpo polisial ta anunsiá di detenshon di dos sospechoso mas.