Ministerio Publico: No ta inicia investigacion penal contra parlamentario Besaril

ORANJESTAD – Ministerio Publico lo no inicia un investigacion penal contra Parlamentario di partido MEP Guilfred Besaril, relaciona cu un accidente den cual e tabata envolvi casi un aña pasa. Den un carta dirigi na e parlamentario, Besaril ta wordo informa cu for di e ‘feitenonderzoek’ conduci den su caso, no a sali afo cu e ta culpabel di loke e lo ta wordo acusa di dje. Primordialmente, cu e no ta esun cu a ocasiona e accidente, y cu e tampoco no a comete ningun acto illegal e anochi ey.

E fiscal cu a atende e caso, a mustra cu studiando e rapport di lands recherche, e ta nota cu mientras cu enberdad Besaril a bandona e sitio di e accidente e anochi ey, esaki no ta castigabel segun e landsverordening ‘wegverkeer’. Ademas, e investigacion di hechos, a menciona tambe cu Besaril a presenta despues serca polis y a haci un declaracion. “Den media a sugeri cu bo lo a bandona e sitio di accidente pa evita un test di alcohol. Esey no a keda demostra den e investigacion. Tampoco a keda proba cu polis no a bin na e sitio di accidente, debi na e hecho cu bo ta un miembro di parlamento di Aruba”.

Besaril como reaccion na NoticiaCla.com a mustra cu, e tabatin tur informacion y motibo pa pensa cu tur cos tabata na ordo for di comienso. “Lamentablemente Trias politica no ta conta pa parlamentario di oposicion y solamente pa parlamentario cu gobierno tin man riba nan cabes” Besaril a bisa. E ta bisa esaki mirando con a dicidi di cuminsa un ‘feitenonderzoek’ contra dje, siendo cu e tabata sigur cu tur cos tabata ‘ok’. Ademas Besaril ta mustra cu for di juli aña pasa, cu rapport di polis den su man, (cu ta bisa cu e no tabata culpabel), e mester a warda pa ministerio publico haci un investigacion. Y awe e parlamentario a ricibi e noticia (lesa e carta aki) cu e no a haci nada robez y comete contra ley. E ta referi na e.o. e alinea dos di e carta.

E ta lamenta cu pa e periodo aki, e y su famia mester a soporta un avalancha di critica. Cu e carta aki tur duda ta keda kita segun e parlamentario. “For di awor mi por cana cu mi cabes na laira”. E ta contento cu tur loke e la conta prensa for di un inicio, a bin bek den e rapport di polis y tambe den e carta confirma pa ministerio publico. “E bottomline ta cu no tabatin base ni pa un investigacion penal. Laat staan pa tur e sushamento di nomber ey cu a bin ta tuma lugar pa un aña largo” e parlamentario a bisa finalmente. E ta manda mensahe tambe pa cualkier persona cu ta purba susha su nomber a raiz di e caso aki, lo topa e parlamentario dilanti mesa berde.