Gobierno a dicidi cu no ta uza scanner mas pa e eleccion aki!

ORANJESTAD – Prome minister di Aruba Evelyn Wever Croes diaranson atardi den un conferencia di prensa di ultimo ora a informa cu a dicidi cu no tin necesidad pa uza e scanner mas cu tabata programa pa uza ora di caba deposita bo voto na juni proximo. Mientras cu a duna como motibo cu e cifranan di Covid19 no ta rekeri pa un medida asina mas, a bisa tambe si cu e ta debi tambe na e atake, comocion y controversia cu e tema aki a crea y trece duda den e proceso electoral. Pa evita tur duda den integridad di e proceso, e mandatario a bisa cu el a tuma e decision cu no ta uza e scanner mas. E parti di e QR code pa registra e carchi di vota si ta sigui, pasobra pa esey no ta rekeri un cambio di ley. Mes momento a bisa si cu no tabata pa e motibo di presion cu 11 parlamentario (tres fraccion) a entrega un carta mas tempran awe, indicando cu nan no ta bay sostene e ley cu mester pa haci e cambio necesario pa por a uza e scanner. 

Cu e informacion aki, ta kita tur duda y speculacion pa cu e proceso di votamento. Di otro banda, ta bay bek pa e sistema ‘bieuw’ cu ta nifica cu e resultado lo no ta cla mas mesora ora cu e urnanan cera. E mandatario a lamenta e atake di politiconan riba e Conseho Electoral y Censo a sosode, cu e caso di scanner.