Tres fraccion den Parlamento no ta sostene cambio di ley electoral proponi

ORANJESTAD – Na nomber di 3 fraccion den Parlamento, lider di fraccion di partido AVP, sr Marlon Sneek a entrega un carta na Gobernador di Aruba diaranson, indicando cu por lo menos 11 parlamentario ( e tres fraccionan) no ta sostene e cambio di ley cu gobierno kier introduci pa por acomoda cierto cambionan den proceso di votamento e aña aki. Y saliendo di e punto di bista cu ta partido MEP (8 asiento) so lo vota pro, ta mustra cu segun Sneek, e ley aki lo no ricibi sosten. 

E CARTA

Den e carta, e tres fraccionan ta referi na e hecho cu gabinete demisionario Wever-Croes kier introduci cambionan pa e proceso di votamento. Segun Sneek, durante e presentacion recien di e presidente di Conseho Electoral Glenn Thode, a resulta cu gobierno tin intencion di prosegui cu e intencion aki, no obstante e obhecion di un mayoria di miembronan di Parlamento. Segun e carta, e cambionan ta bay hopi leu y ta viola privacidad di e votador, y no ta ofrece proteccion e privacidad aki. Ademas, segun e carta, e gabinete den su forma demisionario, no ta autorisa pa inicia un cambio di ley asina controversial durante e periodo cu e ta demisionario. 

SOSTEN

Como tal, e suscritonan den e carta ta sigura Gobernador cu pa cuida e principio di bon gobernacion, y proteccion di derecho di individual, cu e cambio proponi di ley, lo no conta cu sosten di e fraccionan en cuestion (11 asiento), y tampoco lo permiti continuacion di e intencion di e ley. A forma pa AVP, sr Marlon Sneek, pa RED Ricardo Croes y Daphne Lejuez como fraccion independiente. Riba e carta tin tambe e nomber di Alan Howell di POR, pero segun Sneek, Howell no kier firma pasobra e lo a vocifera caba den e reunion cu Thode, di no ta sostene e ley aki.