Knops ta disgusta cu St Maarten y no ta duna e di 5 tranche

DEN HAAG – Den un carta di por lo menos 5 pagina, secretario di estado Hulandes Raymond Knops ta bati dede di prome minister di St Maarten sra Jacobs, pa su falta di maneho di e isla,  y como tal a bolbe wanta e otorgamento di e di 5 tranche (placa) pa e isla. Otro siman e mandatario ta bishita tur tres isla Riba, y ta spera cu e ora ey sra Jacobs por tin un solucion concreto pa remedia tur e problemanan cu tin. 

PROBLEMANAN

Segun Knops, no ta un sino un cantidad di asunto ta bayendo malo na St Maarten, riba cual gobierno di e isla no tin control ariba. Knops ta bisa cu constantemente a haci promesa na dje cu no a cumpli. Y como tal e confiansa ta atacha. Basicamente e mandatario Hulandes ta bisa cu no tin confiansa mas den e gobernante y kier un solucion a corto plazo. Tanten cu esey no sosode, e isla no ta haya e siguiente ayudo financiero cu e tin mester di dje pa atende cu e pandemia. 

AEROPUERTO

Un di e problemanan grandi ta e asunto di renobacion di e aeropuerto y tur cos cu a bay robez cu e proyecto ey. Retiro di cierto personahe di maneho den e proyecto, sin tene cuenta cu e regla con pa haci esaki, ta pone cu Knops ta niun tiki contento cu e proceso. E ta baha su disgust tambe riba e mandatario di e isla, indicando cu berdad e mandatario a priminti cu cos lo drecha y cu e gobierno ta hacienda tur cos possible pa resolve tur problema. Pero Knops ta bisa cu e no ta wak prueba di esaki y esey ta cay pa responsabilidad di e prome mandatario di e isla. Concluyendo, Knops ta sigura cu tanten cu e gobierno no regla su asuntonan drechi, no ta firma pa mas placa pa e isla. Por lesa e carta AKI.