Pandemia tabatin impacto grandi riba entrada di fondo di AZV
ORANJESTAD - Manera ta custumber pa hopi aña caba, Organo Ehecutivo AZV a entrega su relato financiero na tempo y acompaña cu un declaracion di aprobacion di accountant. Pero pa bisa cu 2020 tawata un aña manera añanan anterior ta algo otro. Asina e organo ta bisa recientemente den un comunicado.
Na maart 2020 Covid-19 pandemia a drenta Aruba y pronto por a nota efectonan di esaki pa e cuido medico. Cuido regular mester a duna lugar pa cuido relaciona cu Covid y e pandemia a trece incertidumbrenan financiero grandi pa Pais Aruba y consecuentemente pa AZV. Riba nivel di Reino palabracionnan a wordo haci pa yuda Aruba financieramente.
CONSECUENCIANAN PA E CUIDO
E introduccion di e distanciamento social di 1 meter y mey a resulta den un accesibilidad mas limita y temponan di warda mas largo pa e cuido medico regular. Tambe e manera di duna servicio a cambia drasticamente door di protocolnan nobo y e uzo di materialnan di proteccion. Tawatin mas cuido via telefon y via canalnan digital cu anterior. Cuido medico den exterior a bira un desafio door cu trafico aereo tawata restringi na nivel mundial y e partnernan den exterior no por a brinda e cuido manera custumbra.
E gastonan regular di ImSan a cay 4.3 miyon mas halto cu premira, door cu ImSan a uzo extra capacidad pa yuda cu e cuido ca a stagna pasobra e frontera tawata cera. Tambe e gastonan di e uzo di camber di operacion ta mas halto door cu e capacidad di OK den Horacio Oduber tawata mas abou pa via di Covid-19. Conforme presupuesto ImSan a ehecuta e masterplan na ora y p’esey e capacidad pa haci radioterapia, cuido di wowo y cuido urgente a wordo amplia. Pa via di esaki un cantidad di tratamentonan cu antes lo wordo haci den exterior a sosede na Aruba.
CONSECUENCIANAN FINANCIERO
Un di e condicionnan mara na e ayudo di likides hulandes tawata e instruccion pa baha e gastonan di AZV cu 5 miyon pa luna. AZV a haya e tarea pa realisa esaki y bou di hopi presion di tempo AZV a traha un plan (5-wave model), teniendo cuenta cu e mision di AZV cu ta garantisa e calidad y accesibilidad di cuido pa gastonan acceptabel. Mediante di un cooperacion intensivo cu Directie Financiën, Pais Aruba ta logra pa AZV ricibi e likides necesario, permitiendo AZV cumpli cu e palabracionnan di pago cu tawata andando.
CIFRANAN CLAVE
E cifranan clave di AZV ta mustra cla ki efectonan e pandemia tawatin riba e entradanan di e fondo di AZV. E prima y e suma di e BAZV ta hopi mas abou cu den 2019 (-23%), mientras e gastonan di cuido si a sigui subi. Un otro manera pa ilustra e consecuencianan financiero di e Covid crisis ta e relacion gastonan di AZV y Producto Bruto Interno (GDP), cu e añanan anterior tawata entre 7,5% te 7,8%. pa motibo cu e PBI a baha substancialmente na 2020, e gastonan di AZV den relacion cu e PBI ta relativamente mas grandi cu añanan anterior, yegando na 11,6%.
ORGANO EHECUTIVO
Internamente e Organo ehecutivo AZV a haci tur loke ta posibel pa baha gasto. Vacaturanan existente y nobo a wordo wanta y siguiendo e instruccion di gobierno a yega na un acuerdo cu e sindicato di trahadornan pa reduci salarionan cu 12,6% for di mei 2020. E suma retene a keda deposita den e fondo di FASE.
AGREDICIMENTO
Pa AZV funciona optimalmente, AZV ta depende grandemente di e partnernan. AZV kier gradici su partnernan den cuido cu ta primeramente responsabel pa e calidad di e cuido pa e aseguradonan y pa e esfuerso grandi haci durante e pandemia den 2020. Un palabra di danki tambe ta bay na diferente departamento di gobierno cu a coopera intensivamente cu AZV manera e Minister y e oficina di Minister di Turismo, Deporte y Salubridad, e departamentonan di Salubridad Publico, Finansas, DIMAS, DIMP y Censo.
A.T.A: Turismo ‘stayover’ pa Aruba a crece cu mas di 25% den maart 2024
ORANJESTAD - Den e prome kwartaal di 2024, a conta cu cifranan prometedor pa turismo como e pilar di entrada primordial y di suma importancia pa economía di Aruba. Asina e oficina di turismo di Aruba ATA, a bisa den un comunicado. A.T.A. ta pone hopi enfasis riba e modelo di “High Value-Low Impact” cu ta para pa un balans entre cuater pilar cu ta e ‘Calidad di Bida di e residente’, ‘Calidad di Experiencia di e Bishitante’, Proteccion y Preservacion di Naturalesa & Medio Ambiente, y Contribucion Economico di e Sector Turistico’. E meta ta pa sigui mantene esfuerzonan den linea segun e balans menciona, y logra aumenta e entrada proporcionalmente mas cu e volumen cu nos destinacion ta ricibi. Capacidad di carga tambe ta sigui ricibi atencion di parti di A.T.A. di diferente manera.
Aruba ta den e top 5 pa loke ta e hafnan pa crucero den Caribe
ORANJESTAD – Aruba (y Corsou) ta figura den e top 5 di hafnan pa barconan crucero segun e portal cruisefever.net. Ta considera Aruba esun mas conoci di e islanan ABC, segun e portal. E haf di Aruba ta popular pa cruceronan cu itinerario di 8 pa 12 dia. E beachnan blanco, historia colonial, y e seguridad ta motibonan pa e escogencia aki. No descuida pa e oportunidad di compras tambe. Corsou tambe ta figura den e top 5 na di ultimo lugar, esta #5 compara cu Aruba cu ta na number 2. E edificionan colonial tambe y e ciudad Willemstad, e rifnan colorido y e cafenan interesante tabata motibo suficiente pa scohe e isla tambe. E prome pais den Caribe ta St Maarten, sigui pa Aruba, Grand Cayman, San Juan y Corsou.
SETAR a tene su Avigilon ALTA Launch Event cu enfoke riba e futuro di seguridad
CBS: Bestaansminimum a subi atrobe na Aruba debi na aumento di gasto di cuminda
ORANJESTAD - E bestaansminimum ta e nivel minimo di entrada cual ta wordo percibi cu ta necesario pa logra mantene un nivel di bida adecuado den un cierto pais. Usualmente e bestaansminimum ta wordo determina door di calcula e gasto di tur e recursonan esencial cu un adulto ta consumi den un luna of aña. Generalmente esaki ta wordo yama un indice basico di necesidad, y e ta varia segun e prijs di cuminda, paña, vivienda, transporte y otro articulonan den e “canasta”. Escalanan di ekivalencia ta wordo usa pa ahusta e nivel minimo di entrada percibi pa hogarnan di diferente tamaño y composicion. E escala ta asigna un peso di 1.0 pa e prome adulto y 0.5 pa cada adulto adicional den e hogar (edad 16+) y un peso di 0.3 pa cada mucha (edad 0- 15 aña). E bestaansminimum ta basa riba cifranan di e rapport “Bestaansminimum 2010” y ta wordo actualisa mensualmente pa cu inflacion usando e CPI mensual. E unidad di referencia den e rapport aki ta di un hogar cu ta consisti di dos (2) adulto y dos (2) mucha (edad 0-15 aña).
WEB Aruba ta firma acuerdo cu Seven Seas Water Group pa construi planta SWRO-3
ORANJESTAD – Diaranson dia 17 di mei ultimo, WEB Aruba y Seven Seas Water Group (SSWG), un proveedor multinacional di ‘Water-as-a-Service® (WaaS®) solutions’, a firma un acuerdo Build-Own-Operate-Transfer (BOOT) cu un termino di traspaso di 10 aña. Seven Seas Water (Aruba) VBA lo construi un planta di SeaWater Reverse Osmosis (“SWRO”) cual lo contribui cu un minimo di 16.500 meter cubico di awa potabel pa dia. E asina yama SWRO-3 lo ta parti di WEB Aruba su plan di termino largo y su Water Road Map pa satisface demanda continuo di awa, manteniendo suministro confiabel. E planta nobo lo reemplasa e actual facilidad temporal di produccion di awa. SSWG a haya e contrato despues di un proceso di tendering y negociacion na 2023. Lo construi e planta SWRO-3 riba tereno existente di WEB y ta planea pa cuminsa opera pa medio 2026.
Banco Central ta mantene e tasa di reserva obligatorio na 22,0 porciento
ORANJESTAD - Conforme e tarea di e Comite di Maneho Monetario (CMM) pa evalua, determina y duna transparencia riba e accionnan di maneho monetario di Banco Central di Aruba (BCA), BCA ta comunica lo siguiente. Durante e reunion di 26 di februari 2024, CMM a dicidi pa mantene e tasa di e reserva obligatorio na 22,0 porciento entrante 1 di maart 2024. Di e manera aki, e banconan comercial mester tene un balansa minimo na BCA cu ta igual na 22,0 porciento di e depositonan riba termino cortico di nan clientenan. E decision pa mantene e tasa di reserva obligatorio ta basa primordialmente riba e reservanan oficial cu ta relativamente serca di e limite minimo di e ARA, apesar cu tanto e reservanan oficial como e reservanan internacional a keda adecua y ta premira pa permanece asina durante 2024. Adicionalmente, likides excesivo di e sector bancario ta mustra un tendencia ascendente durante e ultimo lunanan. Finalmente ta considera prudente di mantene e reserva obligatorio na su nivel actual, mirando crecemento continuo di credito y su efecto potencial riba reservanan internacional. BCA ta sigui monitorea e desaroyo den e reservanan y likides excesivo y lo por dicidi di cambia e tasa di reserva obligatorio, si ta considera esaki necesario.
Follow NoticiaCla
