Cuater sospechoso deteni durante entrada hudicial na Cayenastraat

ORANJESTAD - Diasabra ultimo diferente departamento di Cuerpo Policial Aruba a uni na e team di Recherche pa tene haci un entrada hudicial na un cas situa den Cayenastraat na San Nicolas. Ta trata aki di un esfuerso conhunto di Polisnan forensico di BFTO, Polisnan cu cachonan di e unidad K9, Polisnan uniforma di San Nicolas, e ekipo cu ta combati ladronicia di auto, hunto cu Fiscal y Hues Comisario a haci e “huiszoeking”, durante cual a detene cuater sospechoso.

BESLAG

Polis a tuma varios substancia y obheto den beslag, incluyendo marihuana, 5 pochi di mata di marihuana y e droga “base”, telefon celular, laptop, wasmashin y arma - “luchtdrukpistool” y revolver, como tambe un motor di auto y un “bivakmuts” color preto.

MOTIBO DI DETENCION

E detencion di e cuater sospechosonan a tuma luga a base di e substancia y obhetonan cu a wordo tuma den beslag. A detene tres sospechoso pa posesion di droga (marihuana) y e arma di candela y a detene tambe e doño di cas, esta Jan M., pa posesion di e cinco pochinan di mata di marihuana y e wasmashin cu ta procedente di ladronicia. E investigacion den e caso aki ta sigui. Nota: Foto archivo ta di otro caso di entrada hudicial.