Parlamentarionan nobo na Corsou a huramenta dilanti Gobernador

WILLEMSTAD.- Awe mainta 20 miembro nobo di parlamento a hura dilanti gobernadó, Lucille George-Wout pa e periodo parlamentario 2021-2025. Lider polítiko di partido PAR, Eugene Rhuggenaath na último momento a disidí ku e no ta drenta parlamento mas i pronto por spera ku Steven Croes lo drenta parlamento pa asina kompletá frakshon di e partido. Despues di a presta e akto di huramentu parlamentario pa partido MFK, Charles Cooper a bisa ku awe mes frakshon di MFK lo manda un karta pa presidente di parlamento pa yama reunion ku karakter di urgensia pa kuminsá atendé situashon di pais. Despues di a sali palasio di gobernadó parlamentarionan a akudí pa sala di reunion di sindikato PWFC pa e promé reunion di e parlamento nobo. Mesora a eligí presidente i vise-presidente nobo pa parlamento. Ku 20 voto pro i 0 kontra parlamento a vota unánimemente pa Charetti America-Francisca komo presidente di parlamento i Ruthmilda Larmonie-Cecilia komo vise-presidente di parlamento.