Encuesta: Sorpresa den partidonan chikito y mayoria ta prefera coalicion

ORANJESTAD – Segun e ultimo encuesta di noticiacla.com en colaboracion cu Doc Opleidingen+, 96% di esnan cu a participa, lo vota, di cual 89% sa caba pa ken. Esnan cu sa caba y tabata dispuesto pa comparti nan voto, 33% ta vota pa MEP, sigui pa AVP(22%). E sorpresa ta CURPA cu ta sigui cu 13%.  Entre e grupo cu a participa, 41% ta prefera un gobierno di un solo partido cu majoria, pero esey ta indica cu 59% di e participante lo prefera un coalicion. 

E districto cu menos kier un gobierno cu participacion di MEP y/of AVP, ta San Nicolas, rechasando e dos partidonan aki. Den e encuesta aki, un total di 1800 persona a participa durante 2 dia y di cual 52% tabata homber y e edad cu mas a participa ta e grupo di entre 45-55 aña. E encuesta aki tabata un colabracion di noticiacla y doc Opleidingen +

E RESULTADO COMPLETO

Mescos cu e encuesta anterior, practicamente tur cu a participa, a bisa di lo vota, y un grupo un poco mas chikito, a bisa cu nan sa caba pa ken nan vota. E grupo di esnan cu no sa si nan ta bay vota, a bira menos y awor ta 3% y e grupo cu no sa pa ken, ta 8%. 

PARTIDONAN

Den e encuesta aki, a scohe concientemente pa pone tur partido cu a inscribi (12) no obstante e hecho cu tin e posibilidad cu algun partido lo no por ricibi e cantidad di 587 firma necesario pa participa. 

E secuencia di partido den porcentahe:

MEP -  33%

AVP – 22%

CURPA – 13%

RAIZ 9%

MAS 8%

PPA 5%

POR 4%

ACCION21 4%

RED 1%

UPP 1%

HTC 1%

Pueblo Prome 0.29%

UNDA Y KEN A VOTA PA E PARTIDONAN 

Den e encuesta, partido MEP ta esun cu a haya mas sosten, sigui pa AVP, manera indica anteriormente. Esnan den e grupo di edad 45-55 aña ta esun cu mas a scohe pa MEP (24%) mientras cu e partido ta menos popular den esnan hoben (18-24 aña) unda cu 7% a scohe pa MEP. E grupo aki, esta di hoben a score halto cu e partido POR (13%) sigui pa e partido di hoben (HTC) cu 11%. Pues POR ta sosteni den e encuesta aki pa e hobenan. Pa loke ta districto, kedando riba e partido cu a haya mas sosten, MEP segun e encuesta aki su sosten mas grandi ta di Oranjestad y Noord cu 23%. Pero si sigui cu e dos districtonan aki, nan a score mas hopi si cu partido Pueblo Prome cu 40% cada un (districto). 

KI TIPO DI GOBIERNO

Pa loke ta e constelacion di tipo di gobierno, manera a bisa caba, un grupo grandi di esnan cu a participa na e pregunta aki, a scohe pa un gobierno di un solo partido, pero esey ta indica cu toch pa casi 60% di participante, un gobierno di coalicion ta preferi. 

Den edad, e grupo di edad cu mas a solicita pa e escogencia aki ta di e grupo di 65 aña y mas halto, di cual 52% lo kies pa un gobierno di 1 partido. E grupo di edad cu menos kier e escogencia aki ta di e edad 35 pa 44 aña. Si mira e districto su patronchi di voto entre e encuestadornan, esnan di districto di Oranjestad a scohe mas pa e opcion aki (48%) mientras cu San Nicolas ta esun menos receptivo pa un gobierno di un solo partido (30% so). Pa e di dos escogencia, esta di un gobierno di coalicion entre un partido grandi y chikito(nan), San Nicolas ta esun cu ta mas receptivo pa e scogencia aki (70% lo kies pa esaki), mientras cu Oranjestad y Noord ta esun cu menos receptivo pa un gobierno di un coalicion di un partido grandi y un partido(nan) chikito. Mirando cu tin basta partido ‘chikito’ a pone e opcion tambe di si ta interesa den un coalicion di solamente partidonan chikito, den un possible bloke of aliansa, lagando asina e (dos) partidonan grandi afo. E grupo cu ta mas receptivo pa esaki ta di e grupo di edad entre 35 y 44 aña cu 30% mientras cu esnan cu mas resistencia pa esaki ta di edad di 65 aña y mas halto cu ta 14%. Pa loke ta districto, San Nicolas ta mas receptivo pa un gobierno cu ta laga tanto AVP como MEP afo, cu ta San Nicolas cu ta 29%.